Atualità

Sostigní l’archirida tl setur dl’agricoltöra da munt por amplié süa importanza tl setur dl’economia locala: chësc á sotligné l’assessur provinzial Arnold Schuler tratan l’incuntada di mëmbri dla lataria „Brimi“ incö (17/04) a Porsenù. „Les lataries soziales dl Südtirol pó ciamó mioré süa posiziun tres n renforzamënt dla colaboraziun y sostigní insciö ince de plü i zidladús.“

Le Ciamp Inovaziun y Consulënza informëia che da incö, vëndres ai 17 de aurí, él da ciafé sön süa plata internet ofiziala n codejel de presentaziun y spligaziun dla grafia nöia dl Ladin dla Val Badia. N codejel te na verjiun stampada cun dötes les informaziuns ti gnará proscimamënter metü a desposiziun ai insegnanc y ales insegnantes dles scores ladines dla Val Badia.

La poscibilité da ti dé na familia ai mituns y ales mitans é la chestiun prinzipala dl’adoziun. Por sensibilisé i zitadins sön chësta forma speziala de raport él la Repartiziun Politiches Soziales che á metü da jí na campagna de sensibilisaziun. Dai 20/04 inant gnarál taché sö placac sön les architades dles corieres te Gherdëna, a Balsan, tl Sarntal, tl Salten-Scilier, y sön le Ritten.

Düc i artisć y dötes les artistes dl Südtirol, de Fascia y di trëi Comuns de Suramunt á ciamó tëmp cina ai 29 de má da dé jö sües operes d’ert por le Concurs artistich 1915 – 2015 che é gnü scrit fora dala Repartiziun Cultura ladina en gaujiun dl centená dla Pröma Vera Mondiala. Le valur complessif di pesć é de 20.000 Euro. Ara se trata dla terza ediziun de chësc concurs.

L’ediziun nöia dla revista dla Comisciun provinziala por l’avalianza dles ëres dal inom „ëres – Fraueninfodonne“ tematisëia te süa verjiun plü atuala la rapresentanza de jëne tla politica cun n’odlada ales proscimes eleziuns comunales dl mëis de má te Südtirol.

Dötes les zitadins y düc i zitadins che adora l’abonamënt „Südtirol Pass 65+“ y che á complí o complësc i agn ti pröms cater mëisc de chësc ann, á ciamó tëmp cina la fin d’aurí da renové l’abonamënt. Dai 71 agn inant é le prisc por n abonamënt anual dl Abo65+ de 20 euro.

Tl cuntest di proiec de teater urganisei dala Repartizion Cultura y Ntendënza ladina vëniel metù a jì DUMAN, vënerdì, ai 17 d’auril, dala 11:30 tla Cësa de Cultura de Sëlva na reprejentazion teatrela dla sculées y di sculeies dla segonda tlas dla scola mesana de Sëlva dal titul „Ma quando finisce questa guerra?“.

„N’edema de incuntades“: chësc é le moto dl’ediziun 2015 dl Summer Camp dl’Euregio Tirol-Südtirol-Trentin che vëgn organisada por 60 jogn dai 11 ai 14 agn dai 19 ai 26 de messé tl’Istitut Rainerum de Balsan. Al é ciamó posć lëdi, les iscriziuns po gní dades jö cina al pröm de jügn tl Ofize Euregio de Balsan.

Le Consëi provinzial por l’avalianza dles oportunités y l’Ofize dles Ëres á presenté incö, mercui 15 de aurí les aziuns preodüdes por l’Equal Pay Day dl 2015 cun le moto „Le laur te familia ne vëgn nia paié“. La majera aziun sará le concurs da soperscé por ëi dla politica, dl sport y dl’economia ai 17 de aurí dales 13 tla plaza Muser a Balsan.

La Junta provinziala á aprové incö (14/04) le proscim vare dla reorganisaziun dl setur dl’energia dl Südtirol y che reverda la conzesciun de na garanzia bancaria de 276 miliuns de euro por la cumpra dles cuotes ENEL da pert dla sozieté dl’energia provinziala SEL Spa. Implü á la Junta aprové le consëi d’aministraziun dla SEL Spa.