Atualità

Cun na grafica nöia y na ligna de aziuns mirades al aumënt dla segurëza sön strada él la Provinzia de Balsan che á ince planifiché por chësc ann na ligna de mosöres de sensibilisaziun tl contest dla campagna „No Credit“. L’assessur Florian Mussner y le diretur Valentino Pagani á presenté incö ai 30/03 i contignüs nüs, adom al procuradú general Guido Rispoli y le primar Manfred Branstätter.

Da incö (27 de merz) sarál poscibl da descurí les arees dles Dolomites patrimone mondial dl Uneso diretamënter da ciasa cun n iade virtual sön Street View de Google Maps. „La Fondaziun Unesco é la pröma istituziun dla Talia che pó s’anuzé dl Trekker Loan Program de Google“, sotlignëia l’assessur Richard Theiner, presidënt dla Fondaziun Dolomites Unesco.

Te süa secunda „tlausöra“ dl 2015 á la Junta provinziala spartí incö (27 de merz) ressurses ajuntives por 213 miliuns de euro a bëgn di seturs dl’assistënza ala cura (60 miliuns de eruro), dla sanité (38 miliuns), dl’assistënza ales families (10 miliuns) y dl frabiché abitatif (50 miliuns).

La Junta provinziala mët a desposiziun por le 2015 indöt 45 miliuns de euro por la costruziun de frabicac nüs. I programs d’intervënt é gnüs aprová incö (27 de merz) tla sentada de tlausöra dla Junta sön proposta dl’assessur Christian Tommasini. Por le momënt vëgnel lauré sön 59 frabicac nüs, la priorité reverda les scores.

187 operes, investimënc por indöt 380 miliuns cina le 2019 cun les strades dl Prener, dla Val de Puster y dla Val Venosta sciöche priorités prinzipales: chësc é le contignü prinzipal dl plann plurianual 2015-19 dla Repartiziun Infrastrotöres che é gnü aprové incö (27 de merz) dala Junta provinziala. L’entrada dla Val Badia é lapró.

Aprofondí les tematiches di conflic te süa aspec plü desvalies por renforzé l’importanza di valurs dla convivënza y dla pesc: chisc é stá i fins prinzipai di proiec culturai metüs a jí dala Repartiziun dla Cultura y Intendënza ladina tles scores mesanes y altes dla Val Badia y te Gherdëina y coordiná da Erika Castlunger.

Marion Piffer Damiani é gnüda reconfermada por i proscims trëi agn dala Junta provinziala te süa inciaria de presidënta dl Consëi de fondaziun dl Museion.

Le presidënt dla Provinzia Arno Kompatscher presentará, adöm cun i assessurs por la cultura Florian Mussner, Christian Tommasini y Philipp Achammer, en jöbia ai 2 de aurí a Balsan la ligna de scomenciadies che é söl program por i 100 agn passá dala Pröma Vera Mondiala (1914-1918).

Les Consultes di Jogn di grups linguistics ladin, todësch y talian s’á incunté incö, 26 de merz, a Balsan por na pröma sentada deboriada. „Sciöche ënc de consulënza dla Junta pro tematiches che reverda i jogn á les consultes na funziun importanta che dess tl dagní gní portada inant tres de plü te na manira coletiva“, á sotligné i assessurs Florian Mussner, Christian Tommasini y Philipp Achammer.

I proiec concordá dala Provinzia y dal CONI por favorí le sport dl Südtirol y le finanziamënt dles strotöres sportives é stades al zënter dla pröma sentada dla comisciun paritetica nöia danter la Provinzia y le Comitê olimpich nazional talian, che á l’inciaria fina l’ann 2018.