Atualità

La Junta provinziala s’à dè jö incö te süa sentada edemala dl 17 de merz cun la stlüta dla repartiziun dl stè da pert de Sanćiana, na dezijiun che é gnüda sostignida tres n documënt unitar metü adöm danter les rapresentanzes dles categories profescionales dl ospedal da Sanćiana y dla direziun dl Raiun soziosanitar dla Val de Puster. Intratan él gnü istituì n grup de laûr por atué i proscims vari.

La Junta provinziala à aproè incö (17 de merz) la pröma pert di finanziamënć dl 2015 che reverda le sostëgn de films de documentaziun y d’aziun che vëgn registrà tl Südtirol. I esperć dla BLS à chirì fora i cinch proieć che gnarà sostignis tres le Fonds südtirolej por les produziuns.

Al Museum Natöra dl Südtirol él gnü inaudè incö, lönesc ai 16 de merz, la mostra cun i ponjins y i conići, che é rovada ala nona ediziun y che àn podarà vijité ćina ai 6 de aurì. Les tlasses scolastiches é periades da prenotè.

Promöie la pasciun por la musiga di mituns, arichì les funziuns liturgiches y descedè l’interès por le lingaz dla uma: chisc é i fins prinzipai dla realisaziun dla CD „Gejù cun tè poi crësce“, na racoiüda de ćianties religioses, metüdes adöm en colaboraziun danter la scora elementara da La Val y le Ćiamp Inovaziun y Consulënza dl’Intendënza ladina, che é gnüda presentada incö tla dlijia de La Val

L’assessuria por la sanité Martha Stocker y i assessurs por la formaziun Florian Mussner, Christian Tommasini y Philipp Achammer à firmé incö (13/03) por le pröm iade n’acordanza por le reconescimënt abonora de dificoltês d’aprendimënt de scolars y scolares. Tres chësta acordanza dessel gnì smendrì les dificoltês te scora y alisiré le sostëgn por la cura danter le sistem sanitar y scolastich.

Le proiet de renovamënt dl’aministraziun provinziala reverda inće l’internet cun na presënza nöia che baratarà fora la misciun atuala www.provinzia.bz.it dla Rëi Zivica. Deboriada cun n demane nü ciafarà l’Aministraziun provinziala inće na süa plata d’azès y n motor de chirida efiziënt fora dla ćiasa Google, che ti po pormez a düć i contignüs y sorvisc dl’aministraziun interna.

Al é ormai na bela tradiziun interladina le tornê de hockey por les scores mesanes che vëgn organisé chësc ann por le 5 iade tles valades ladines. Chësc ann gnarà le tornê organisé a Corvara dal Sorvisc Sport Scolastich dl’Intendënza Ladina de Balsan en vëndres ai 20 de merz cun scomenciamënt dles partides dales 9 tl Stadium dla dlacia “Albert Pezzei”.

I coliamënć transfrontaliers y la situaziun di pendolars sura i confinns é stades les döes tematiches zentrales che é gnüdes tratades incö (12 de merz) a Cuira tratan l’incuntada dla Junta provinziala dl Südtirol cun i rapresentanć dl Chantun Grijuns dla Svizra.

La promoziun dl’ativité artistica, tignì a mënt i avenimënć y les conseguënzes dla Pröma Vera Mondiala y le raport atual impara 100 agn dedô: Chisc é i obietifs dl Concurs artistich 1915 – 2015 che é gnü scrit fora dala Repartiziun Cultura ladina y che é gnü aproè dala Junta provinziala. Fà para po düć i artisć dl Südtirol, de Fascia y di trëi Comuns de Suramunt.L’ultim dé por dè jö é ai 29 de mà.

Le concurs por lingać foresć dl raiun dl Tirol por scores profescionales dl’edema passada a Desproch à portè a n resultat plajor por le Südtirol: Tl concurs de inglesc, a chël che i mius 24 dl Südtirol, dl Tirol dl Nord y dl Ost à tut pert, él stè Otto Trebo da Al Plan che é rové al cuarto post dla tlassifica finala.