Atualità

En lönesc, ai 09/03 s’incunta i rapresentanć dles scolares y di scolars dl‘Euregio por presentè deboriada sües ghiranzes, danterater sön „l’educaziun politica“, la mobilité y i sistems de valutaziun y por se baratè fora cun le rapresentant di scolars federal austriach Lukas Faymann. Do la sentada plenara danmisdé él preodü na conferënza stampa dales 14.30.

Cun indoman (28 de forà) se röia l’invern meteorologich, tl Südtirol él le terzo plü ćiöbe dal ann 1850 cun na temperatöra mesana de 2 degrà sura le valur de de plü agn. Le bilanz dl Sorvisc Meteo dla Provinzia à segnalè che a Balsan é la temperatöra mesana stada de 4,4 degrà. Le dé plü ćialt cun la temperatöra plü alta (+21°) é gnü mosoré a Laces tla Val Venosta.

Incö, mercui ai 25 de forà, él gnü presentè dal Istitut por la promoziun di lauranć (IPL) a Balsan n stüde sön i sistems desfarënć de welfare ti stać europeics en presënza dl presidënt dl Istitut Toni Serafini y dl’assessuria provinziala por le welfare Martha Stocker.

Por daidé i scolars y les scolares dla scora mesana da to la dezijiun sön ći scora alta chirì fora vëgnel organisé plü dis dla "porta daverta" y manifestaziuns d’informaziun te döt Südtirol: ai 03 de merz él sön le program le Dé dla porta daverta tl „ITE – WFO – Sport Raetia“ a Urtijëi y ai 06 de merz tla Scora d’Ert „Cademia“ y scora profescionala por l’artejanat artistich.

Do che le laûr dles ëres ê stè por secui chël dles paures, s’àl daurì por vëres tl 20ejimo secul plü poscibilitês de laûr. Na suraodüda dl svilup tl monn dl laûr dles ëres tla perioda dal 1930 al 1970 y i mudamënć che taca laprò vëgn pitada dala mostra fotografica „Les ëres y le laûr“ che gnarà daurida ai 2 de merz a Balsan.

N aumënt sostanzial y na maiù afidabilité di implanć d’anuzamënt dles eghes publiches gnarà garantis por merit dles desposiziuns de segurëza nöies aprovades incö ( 24 de forà) dala Junta provinziala.

Al à na soma de prësc 9 miliuns de euro le finanziamënt por le program dl 2015 por l’internet aslöm aprovè incö (24 de forà) dala Junta provinziala. „Ćina la fin dl ann – sotlignëia le presidënt Kompatscher – rovarà la fira otica te düć i comuns y insciö podaral mët man le svilup dl coliamënt d’azès final ai utënć.“

Inovaziun y inrescida é stà danter i argomënć prinzipai dla sentada da incö (24/02) dla junta provinziala. L’esecutif cun a će Arno Kompatscher à aprovè les mudaziuns dl plann volumetrich dl Parch tecnologich y les convenziuns anuales cun le TIS y l’Istitut Fraunhofer.

I imprësć a condiziuns avantajades tres le fonds de rotaziun é un di pilastri prinzipai dl sostëgn al’economia dla Junta provinziala. Do che la Provinzia à aumentè le fonds de rotaziun cun indöt 40 miliuns de euro, à la Junta aprovè incö (24 de forà) n’acordanza cun la Ćiamena dl Comerz che prevëiga n aumënt de ćiamò 10 miliuns laprò.

Sura 100 jones y jogn à tut pert incö domisdé (23 de forà) ala scomenciadia „Job and Life“ metüda da jì dal Zënter de mediaziun y laûr de Balsan tla sënta dla Repartiziun Laûr a Balsan por s’informè sön le monn dl laûr y les prozedöres tratan la chirida.