Atualità

L’UNESCO ti dedichea uni ann n dì aposta ala defendura dla rujeneda dl’oma. Chësc dì ie ai 21 de fauré y ti dà n’atenzion particulera al mantenimënt di lingac de mendranza. "L’adurvanza y la cura dla rujeneda dl’oma ie, dantadut per la mendranzes, la fundamënta per mantenì l’identità culturela y dé inant la memoria storica y la usanzes ala generazions che vën docà", nsci l assessëur ladin Mussner.

La sconanza y l’evoluziun dl’autonomia südtiroleja ti ćiaran ala reforma costituzionala che vëgn tratada tla Talia. Chësc è l’argomënt prinzipal tl zënter dl’incuntada da incö (19 de forà) a Hofburg danter Arno Kompatscher y le presidënt Heinz Fischer, olache al é gnü sortissé ćiamò n iade le rode dl’Austria sciöche "garanta dl’autonomia".

La vijita austriaca dl presidënt Arno Kompatscher à metü man incö (19 de forà) cun n’incuntada cun le minister por i afars cun l’éster austriach Sebastian Kurz. Tratan l’incuntada él gnü tratè plü tematiches che reverda danter l’ater l’Euregio, le dagnì dl’autonomia y le svilup dla macroregiun alpina.

Ćina ai 2 de merz dl 2015 saràl poscibl da presentè les teses de laurea, les teses de dotorat, de master y i laûrs d’inrescida che reverda la condiziuns dles ëres tla sozieté o l’ avalianza dles oportunitês danter ëra y ël por fà para al concurs por le pest scrit fora dala Comisciun provinziala por l’ avalianza dles oportunitês.

N iade de 11 chilometri al dé fej i impiegać dependënć dl Südtirol mesamënter por jì a laurè. Tl’ediziun nöia dl „Arbeitsmarkt news“ à la Repartiziun Laûr analisé la destanza danter la residënza di pendolars lauranć y le post de laûr.

Inier (mertesc ai 17 de forà) él tomè le terminn por presentè les candidatöres por la posiziun dl diretur general nü dl’Aziënda sanitara. „Indöt – insciö l’assessuria por la sanité Martha Stocker – él rové ite 22 domandes che gnarà śëgn ejaminades dala comisciun tecnica.“

La fujiun danter SEL y AEW, i dui operadus locai tl setur dl’energia, é oramai rovada al punt da gnì stlüta jö. En sabeda danmisdé (21/02) s’incutarà la Junta provinziala te na sentada straordinara por deliberé sön l’acordanza y dales 10 gnaràl spo sotescrit ofizialmënter dal presidënt dla Provinzia Arno Kompatscher, dai ombolć de Balsan y Maran y dai presidënć de SEL y AEW le contrat de fujiun.

“I dërć dla porsona y l’integraziun tl Südtirol”: chësc é le tema dla campagna de sensibilisaziun nöia che mët man incö por un n mëis y che é gnüda laorada fora dal Sorvisc provinzial de coordinamënt por l’integraziun (KOI). Cun placać de sensibilisaziun ti comuns dl Südtriol ôn insciö motivé da ponsè do sön la proteziun di dërć umanns de vigni porsona y dles sfidades che reverda l’integraziun.

Prësc indöt 133.000 anuzadus atifs, n aumënt sostanzial dles porsones che anüza le trasport publich y funziuns d’adoranza nöies: Chësc é le bilanz de morvëia dl Südtirol Pass da süa ativaziun dai 14 de forà dl 2012. „La cherta unica por i mesi dl trasport publich por döta la Provinzia à motivé tröpes porsones da anuzé tres deplü les ferates y corieres publiches“, à sotligné l’assessur Mussner.

La scomenciadia “Bücherwelten” cun l’esposiziun de libri premià é jüda a piz dan da dui dis (11/02) tl Waltherhaus a Balsan. Les publicaziuns premiades tl ann passè vëgn insciö presentades da en mercui ai 8 de forà inant por n mëis tl foyer dla Biblioteca Provinziala Dr. Friedrich Teßmann y po inće gnì imprestades fora.