Atualità
-
„Job & Life“ : Dé por i jogn che chir laûr ai 23 de forà
Le Zënter de Consulënza de laûr da Balsan organisëia sot al moto „Job & Life“ por le secundo iade chësc ann n Dé por i Jogn ai 23 de forà. Tratan döt le domisdé podarà i jogn sot ai 25 agn s’informè sön les poscibilitês y ofertes tl monn dl laûr, sön la chirirda de laûrs y sön cursc de perferzionamënt.
-
Proiet eGov tles scores: incuntades a Balsan, te Gherdëna y tl’Alta Badia
La ligna de incuntades dl proiet „eGov meets schools“ va inant tles proscimes edemes cun incuntades danter i studënć, professurs y l’Aministraziun publica cun le fin da presentè te scores altes desvalies te Südtirol i sorvisc y les poscibilitês che l’Aministraziun publica ti pita a sü zitadins online. Les proscimes tapes sarà les scores altes te Gherdëna, tla Val Badia, a Maran y Porsenù.
-
Proteziun dales lovines: Training por salvè i compagns
Le numer di morć por gaujia de lovines é jü sö chësc ann tles Alpes. Inće tl Südtirol él gnü registré plü situaziuns de prigo y emergënza por gaujia de lovines tles edemes passades. Por sensibilisé y informè sön le dërt comportamënt da avëi tl caje de lovines él la Provinzia che sostëgn sis camps d’eserzitaziun ARTVA (debann) te sis raiuns dai schi.
-
Dala Junta: Conzesciun dla zentrala de S.Antone-Zënter de Musiga dl’Euregio
La Junta provinziala à anulè incö (03 de forà) la conzesciun che ti é gnüda assegnada ala SEL tl 2009 por l’implant idroeletrich de Sant Antone a Balsan. La conzesciun ti gnarà assegnada ala Eisackwerk srl. La Junta provinziala à implü aprovè l’elaboraziun de n proiet por la realisaziun de n Zënter de Musiga dl’Euregio tl Grand Hotel de Toblach.
-
Les trëi Consultes di Jogn é gnüdes nominades – Start deboriada
La Junta provinziala à nominé incö (03 de forà) les Consultes di Jogn nöies por i grups linguistics ladin, todësch y talian. Les Consultes di Jogn é n organ consultif dla Junta provinziala sön temesc che reverda i jogn. La dorada dl’inćiaria é de trëi agn. La pröma sentada dles Consultes gnarà tignida por le pröm iade deboriada, sciöche sëgn de na colaboraziun plü strënta, ai 26 de merz.
-
Dala Junta: I mëmbri nüs dl Consëi dla Fondaziun Museion é gnüs nominà
Antonio Lampis, Walter Angonese, Marion Piffer Damiani y Barbara Pizzinini: chisc é i mëmbri nüs dl Consëi dla Fondaziun Museion che é gnüs nominà incö (03/02) dala Junta provinziala. I obietifs, les prioritês y la funziun dla Fondaziun gnarà presentà te na conferënza stampa dal assessur Philipp Achammer en jöbia ai 5 de forà.
-
Cooperaziun al svilup: La Junta provinziala à aprovè le program por le 2015
Plü co 2 miliuns de euro investësc la Provinzia de Südtirol chësc ann por la cooperaziun al svilup. En confrunt al ann passè é la soma de sostëgn gnüda alzada dl 10 porcënt. Trëi cherć dla soma va a bëgn de organisaziuns y assoziaziuns che mët a jì proieć de cooperaziun al svilup. La Junta provinziala à aprovè incö (03 de forà) le program por le 2015.
-
Cun les tecnologies nöies é les spëises dla posta jüdes zoruch
L’Aministraziun provinziala à menè fora tl ann passè 580.891 comunicaziuns tres la posta cun na spëisa de zirca un n miliun de euro. Tl 2012 êl ćiamò gnü menè fora le dopl dles comunicaziuns, cun n cost de 1,35 miliuns. „Por merit dl’adoranza de na plataforma digitala él stè poscibl da smendrì tresfora les spëises dal 2013 inant“, sotlignëia l’assessuria provinziala Waltraud Deeg.
-
Parch tecnologich nü: I laûrs de costruziun mët man de merz
Le parch tecnologich nü dl Südtirol, che gnarà fat sö sön l’areal dl ex-Alumix a Balsan Süd, é rové tla fasa de realisaziun. Le parch arà l’inom de NOI – Nature of Innovation – y pitarà alberch por aziëndes d’inovaziun, istituziuns d’archirida y ënć de formaziun. Le conzet, l’inom y l’orientamënt dl proiet é gnüs presentà incö dal presidënt Kompatscher adöm ai direturs dla BLS y TIS.
-
Corvara: Le biotop de Braia Frëida romagn sconè
Le lech artifizial nü che é preodü por l’inevamënt dles pistes da schì tla localité de Braia Frëida a Corvara po gnì fat sö mo messarà gnì smendrì por un en terzo por garantì la sconanza dl biotop tles vijinanzes. Chësta dezijiun é gnüda tuta dala Junta provinziala te süa sentada edemala sön proposta dl’assessur por l’ambiënt Richard Theiner.