Atualità

La Junta provinziala à aprovè incö (20 de jenà) le program anual dla BLS – Business Location Südtirol – che reverda danter l’ater le markting dl teritore, le sostëgn a comuns y aziëndes pro insediamënć y pro le svilup de raiuns de produziun, la realisaziun dl parch tecnologich y le svilup dla mobilité eco-sostenibla.

L’assëgn de cura de pröm livel por porsones che à debojëgn de guern y les prestaziuns economiches a bëgn dles porsones cun n’invalidité zivila, di verc y di surć é gnüdes aumentades y adatades incö (20 de jenà) dala Junta provinziala al aumënt dl cost dla vita. 11.500 porsones podarà s’anuzé di aumënć, por la man publica él preodü na spëisa plü alta de 440 mile euro.

La strotöra aministrativa dla Fondaziun Dolomites UNESCO gnarà plü sotida cun prozedöres plü efiziëntes: chësc à stabilì incö (20 de jenà) la Junta provinziala cun la ratificaziun dles mudaziuns al Statut dla Fondaziun y che reverda l’unificaziun di consëis de direziun y aministraziun te ma plü un n consëi d’aministraziun.

Aumentè les competënzes linguistiches di scolars y sostignì le laûr di insegnanć: Na mapa cun 10 unitês didatiches por l’insegnamënt aladô dl’educaziun linguistica integrada é gnüda presentada incö (19/01) a San Martin de Tor: la material didatich nü fej pert de na seria de publicaziuns realisades por le sostëgn dla didatica linguistica integrada tles scolines y tles scores dles valades ladines.

Le bol dl auto po śëgn inće gnì paié te na forma digitala te düć i ofizi dla posta dla provinzia. An n’à gnanca plü bria da savëi avisa tan che al é da paié. Chësc pon ciafè fora ilò sön le post sc’an conësc i dać dl veicul. Chësc é gnü a s’al dè por mirit de na convenziun danter la Provinzia y la Posta.

L’aprovaziun dla lege che reverda le setur dl’istruziun y dl status iuridich dl personal didatich da pert dl Consëi provinzial porta para, insciö l’assessur Florian Mussner y l’intendënt Roland Verra, plü vantaji inće por la scora paritetica ladina tres l’azetaziun dles ativitês extrascolastiches, la regolamentaziun sön l’assunziun dl personal didatich y la garanzia de continuité tla didatica.

Les chestiuns plü importantes che reverda l’agricoltöra y l’ambiënt podarà tl dagnì gnì tratades tres na mësa torona di rapresentanć dles istituziuns, dles categories y assoziaziuns interessades. La pröma incuntada é gnüda tignida da püch cun i assessurs Theiner y Schuler, che s’aôda „discusciuns davertes y soluziuns concordades“.

En ocajiun dl Dé mondial por migranć y profugs ai 16 de jenà recorda l’assessuria Martha Stocker che les tematiches che reverda i profugs ne é nia estlusivamënter na sfidada locala dl Südtirol o de d’atres Regiuns, mo che reverda döta l’Europa y che po ma gnì davagnada lauran adöm. "Cun la pröma assistënza söl Prener y cater d’atres strotöres dunse nosc contribut", sotlignëia Stocker.

Cun incö, jöbia ai 15 de jenà él piè ia na fasa nöia por ći che reverda la digitalisaziun dles prescriziuns di doturs tl Südtirol. Les rezetes scrites a man sön le papier dess gnì baratades fora vare por vare cun rezetes eletroniches. „Insciö saràl poscibl da dè inant les rezetes plü debota“, à sotligné l’assessuria Martha Stocker tratan la presentaziun a Balsan.

Da atira inant y ćina ai 31 de merz dl 2015 pol gnì presentè domanda por contribuć de spëises de iade por l’ann 2014. Implü él stè meso da paiè fora i aretrać pro i contribuć di pendolars abinà sö ti ultimi agn. "La Junta provinziala à metü a desposiziun l’ann passè feter 5,5 miliuns de euro implü por paiè fora i aretrać", recorda l’assessur por la mobilité Florian Mussner.