Atualità

Ćina ai 9 de forà podarà porsones interessades a n curs de formaziun trienal por mënacrëp presentè na domanda d’iscriziun por fà l’ejam pratich d’amisciun.

La Junta provinziala à azetè incö (13/01) les dimisciuns de Andreas Fabi sciöche diretur general dl’Aziënda sanitara dl Südtirol. Contemporaneamënter él gnü aprovè la prozedöra por la seleziun por la nominaziun dl diretur general nü.

Na colaboraziun danter i dui aeroporć de Balsan y Desproch é gnüda aprofondida inier (12 de jenà) a Balsan dal presidënt dla Provinzia Arno Kompatscher y dal assessur Florian Mussner cun l’assessuria tiroleja Patrizia Zoller-Frischauf, l’ombolta de Desproch Christine Opitz-Plörer y i capi dl post d’ateraje tirolej. N grup de laûr studiarà les poscibilitês de na cooperaziun.

Do l’acordanza arjunta tratan la tlausöra à la Junta provinziala aprovè incö (13/01) le dessëgn de lege che reverda la reforma dl ordinamënt dl personal. „L’aprovaziun da pert dla Junta porta a fin un di percursc prinzipai dl proiet dl’inovaziun aministrativa 2018“, insciö l’assessuria por l’aministraziun Waltraud Deeg.

I 88 miliuns de euro dla cuta IRAP che les aziëndes dl Südtirol paiarà demanco tl 2015 gnarà registrades dala Provinzia sciöche n smendrimënt dles entrades, mo porchël ne saràl degügn tais di finanziamënć te d’atri seturs. „I ùn bele calcolè ite la diminuziun dles entrades de 88 miliuns de euro che gnarà recuperades tres la dotaziun dër alta dl fonds de rotaziun“, insciö le presidënt Kompatscher.

Le Südtirol alda pro les arees plü digitales dla Talia y é ćinamai al pröm post por ći che reverda i azesc internet dles families (73,4%): chisc é i dać che vëgn presentà dales inrescides nöies dl ISTAT sön l’adoranza dles tecnologies modernes de comunicaziun: „L’adoranza dl internet é aumentada de valgügn punć prozentuai en relaziun al 2014“, sotlignëia l’assessuria provinziala Waltraud Deeg.

Dl 2015 paiarà les impreses dl Südtirol zirca 88 miliuns de euro de manco de IRAP: chësc por mirit dl arbassamënt dla basa imponibla IRAP che la Provinzia – sön proposta dl presidënt Arno Kompatscher – ô rezepì daldöt dala normativa preodüda a livel statal.

10 unitês didatiches por la 4a y la 5a tlassa dles scores elementares por l’educaziun linguistica integrada é le resultat de n grup de laûr metü adöm dal monn dla scora ladina, dl Université da Porsenù, dl IPL y dl Ćiamp Inovaziun y Consulënza dl Departimënt Educaziun y Cultura Ladina. Le resultat final gnarà presentè ai 19 de jenà a San Martin dales 16.

L’organisaziun nöia dl’aministraziun provinziala y dl setur dl’ energia é stà i temesc prinzipai dla tlausöra dla Junta provinziala, che é gnüda stlüta jö incö da misdé. Tratan la tlausöra él inće gnü stabilì les tematiches zentrales dl’ativité ti proscims mëisc cun danter l’ater: le plann de performance, la fujiun SEL-AEW, la lege sön le personal y la promoziun dla leteratöra ladina.

Ćina ai 30 de jenà dl 2015 pol gnì dè jö les domandes por fà l’ejam de ladin por l’insegnamënt tles scolines y tles scores. Chi che é interessà a tó pert al ejam mëss fà domanda diretamënter pro le Departimënt Educaziun y cultura ladina adoran i formulars aposta che é da ciafè te vigni direziun y sön la plata web dl’Intendënza ladina.