Atualità

L’Ispetorat por les scolines ladines dl’Intendënza scolastica ladina lascia alsavëi che dai 19 ai 21 de jenà dl 2015 saràl poscibl da fà les iscriziuns di mituns y dles mitans tles scolines dles valades ladines por l’ann 2015/16.

Le renforzamënt dl’autonomia y la daurida dl Südtirol tl vers dl Europa: chëstes é stades les döes prioritês prinzipales dla politica istituzionala dla Junta provinziala tl 2014. Tla conferënza stampa por la fin dl ann 2014 à le presidënt Arno Kompatscher recordè l’ativité dla Junta te chësc ćiamp che reverda inće le renforzamënt dla convivënza y l’intlujiun di zitadins da d’atri Paîsc.

N sostëgn maiù al’archirida y la reforma dl sostëgn dl’economia é stades por le presidënt Kompatscher döes dles prioritês tl setur dl’economia tl ann passè, un di punć prinzipai dl’agenda tl setur dl ambiënt é stè indere l’aprovaziun dles diretives sön l’adoranza di produć fitosanitars. Implü él gnü renové tl 2014 le contrat de sorvisc cun Trenitalia y portè inant la fujiun danter SEL y AEW.

„La politica n’à nia le compit da ciafè soluziuns ai problems individuai, ara mëss indere cheriè les condiziuns de cornisc por che les porsones ais la poscibilité da s’organisé süa vita te na manira responsabla“: le presidënt Kompatscher à metü man incö (28/12) cun chësc pinsier so discurs por la fin dl’ann, te chël che al à nominè les alisiraziuns sön les tasses sciöche na mosöra arjunta tl 2014.

Cun le scomenciamënt dl’ann nü saràl poscibl da fà les iscriziuns por l’ann de scora 2015–16 online cun la cherta di sorvisc. Dai 7 de jenà dl 2015 é les iscriziuns davertes por les scores elementares de düć trëi i grups linguistics, tl mëis de forà podaran fà chëres por les scores altes talianes y te merz por les scores altes ladines y todësces y por chëres profescionales.

Le pat de garanzia é gnü confermè da pert dla Ćiamena di deputać. La Junta à tut sö incö cun sodesfaziun la noela. Implü à la Junta tut dezijiuns sön n contribut straordinar ala Ćiasa dla solidareté, sön le elisocurs y le mantignimënt di jori danter Balsan-Roma, do che la compagnia de fligri Darwin à desdit le contrat de sorvisc.

Na odlada zoruch sön les arjuntes dl ann 2014 y na odlada inant sön les sfidades dl dagnì gnarà presentades dal presidënt dla Provinzia Arno Kompatscher en lönesc, ai 29 de dezëmber te na conferënza stampa a Balsan.

La firma dles convenziuns danter la Provinzia cun i fonds de ponsiun y les banches da incö (23/12) é le segnal de start por l’atuaziun dl model „Sparagn por la Ćiasa“ che prevëiga n imprëst alisiré por la cumpra, la costruziun o le ressanamënt dla pröma ćiasa tres le sparagn complementar por la ponsiun. Le model sarà operatif ti pröms mëisc dl 2015.

Formaziun, ajornamënt, mioramënt dl azès al marćé dl laûr, n’aministraziun efiziënta y la combatüda cuntra la meseria y les descriminaziuns: Chisc é i seturs por chi che al é preodü co-finanziamënć dal Fonds Sozial Europeich dal 2015 inant por i proscims cinch agn (ćina le 2020). La Junta provinziala à aprovè incö (23/12) le program opearif, che gnarà ejaminé śëgn dal’UE.

I Museums Ladins Ćiastel de Tor (San Martin) y Ursus Ladinicus (San Ćiascian) deura indô sües portes ai 26/12 do la palsa sajonala da d’altonn. Ai 30/12 vëgnel metü da jì tl Museum Ladin a San Martin la festa tradizionala por la fin dl ann cun entrada debann al Museum, intratignimënt musical, füć d’artifize, na chentlada jö por la pista da “Picolin” y n sorvisc de trasport da Picolin al Ćiastel.