Atualità

Na convenziun de plü agn por la realisaziun de implanć sportifs gnarà firmada dala Provinzia y dal CONI bele tl scomenciamënt dl 2015: la basa por n’acordanza é gnüda ciafada inier (04/12) dal presidënt dla Provinzia Kompatscher a Roma tratan n’incuntada cun le presidënt dl CONI Giovanni Malagò. Danter les tematiches tratades inće n slalom strënt sön la Gran Risa y i mondiai de biathlon te Puster.

Le Dé mondial dl volontariat ai 5 de dezëmber é por l’assessuria Marta Stocker n’ocajiun de reconoscimënt por le laûr de gran valüta che i volontars fej ti seturs soziai y sanitars. „Por merit dla gran cuantité de volontarsé ne é insciö nia ma nosc sistem sanitar y sozial che funzionëia mo döta la sozieté“, dij Stocker. L’assessuria rengrazia düć i volontars por so impëgn, süa dediziun y so laûr.

Le pröm boletin dles lovines de chësta sajun é online. Al é döes novitês importantes pro le sorvisc cuntra les lovines dla Provinzia chësc invern: na previjiun menüda dl prigo de na lovina por vigni dé dl’edema y na majera frecuënza d’emisciun. Implü él gnü fat fora cun i sorvisc cuntra les lovines vijins da publiché les "situaziuns tipiches".

Le fotograf tirolej Lois Hechenblaikner, le Ćiastel Stenico tl Trentin y les regoles suraregionales che reverda la segurëza sön les pistes da schi é i temesc dl mëis presënć da püch sön la homepage dl’Euregio da ciafè tres la misciun: www.europaregion.info.

Da incö 4 de dezëmber inant é la iesta nöia dla biblioteca provinziala Teßmann online. Le layout dla presënza internet nöia é gnü atualisé cun na forma saurida da odëi cun al zënter i contignüs plü importanć sciöche la chirida tl catalogh, l’aministraziun dl cunt d’imprëst, proieć, vijites y na suravijiun dles manifestaziuns plü atuales. Les informaziuns y i sorvisc é da ciafè te cater lingać.

Le zënter d’osservaziun epidemiologich à presentè incö (03/12) na suravijiun sön l’evoluziun dla sanité tl Südtirol. L’evoluziun demografica y l’aumënt de amarà cronics porta cun sè sfidades nöies, à splighé l’assessuria por la sanité Martha Stocker tratan la presentaziun dl raport di dać dl 2013. Por i proscimi agn él important, insciö l’assessuria, da pité plü sorvisc ti raiuns.

Do le start da inier (01/12) dla macroregiun alpina a Milan sarà le presidënt dla Provinzia indoman (mercui) a Bruxelles y en jöbia ai 4 de dezëmber a Roma: tla capitala europeica él preodü incuntades sön l’energia, le tunel de basa dl Prener y l’A22, a Roma jarara dla staziun dla ferata de Balsan y dla convenziun Rai por les mendranzes.

La Junta provinziala à aprovè incö, mertesc ai 2 de dezëmber, la spartiziun dles ressurses finanziares de 70 miliuns de euro che ti vëgn trasferides dala regiun. 40 miliuns é gnüs lià tres le fonds de rotaziun por sostignì ativitês economiches, 20 miliuns por investimënć ai Comuns y d’atri 10 miliuns por la cumpra y la realisaziun dl azès a zones por frabiché.

Al va inant l’ampliamënt dla rëi de fira otica tl Südtirol: incö (ai 2 de dezëmber) à la junta provinziala aprovè l’intenüda cun la RFI che vëiga danfora da adorè i laûrs de manutenziun sön la linia dla ferata danter Balsan y Maran por mëte n secundo cabl de fira otica sön chësta trassa y aumentè la segurëza dla trasmisciun di dać.

Le trasport feroviar sura i confins fora gnarà amplié por mirit de n’acordanza danter Südtirol y le Land Tirol. Insciö gnaràl pité dai 14 de dezëmber inant de plü coliamënć direć danter Balsan y Desproch y n coliamënt vigni ora danter Franzensfeste y Lienz. „L’ampliamënt dl’oferta é inće n sëgn de vijinanza y comunanza dles provinzies “, insciö l’assessur por la mobilité Florian Mussner.