Atualità

Cun condiziuns nöies à la Junta provinziala aprovè incö (02/12) le contrat de sorvisc por le trasport cun la ferata cun Trenitalia tl Südtirol por i proscimi agn: „Insciö sparagnuse tl dagnì anualmënter 1,7 miliuns, zënza che l’oferta y la cualité dl sorvisc vëgnes smendrides“, à splighé l’assessur por la mobilité Florian Mussner. Implü messarà Trenitala mëte a desposiziun ferates nöies.

N moscedoz de lingac desvalis, n stè dlungia y deboriada, ladin, todësch, talian y inglesc sarà da d’aldì y odëi dai 11 ai 13 de dezëmber dl 2014 a S. Martin de Tor: La Repartiziun Cultura y Intendënza ladina y la Repartiziun Cultura todëscia organisëia adöm cun la ćiasa edituria Folio n workshop, olache ara nen va de leteratöra ladina y süa traduziun te lingac desvalis.

De gragn vari inant él gnü fat inier (1° de dezëmber) tla direziun de na macroregiun alpina tratan la Conferënza de Milan olache al é gnü stabilì la pröma proposta de n plann d’aziun che à sciöche punć prinzipai le svilup economich, le trasport y l’ambiënt. Danter i 1000 delegà êl inier a Milan inće le presidënt Arno Kompatscher, la comissaria UE y i mëmbri dl govern.

Di 322 insegnanć dles scores ladines dla Provinzia da Balsan, ne à incö, lönesc al 1 de dezëmber, 82 nia laurè fajon para al scioper di impiegać publics. La porcentuala che à fat para a chësta protesta é insciö de 25,47 porcënt.

Al vëgn sciazè che sön le monn él plü co 35 miliuns de porsones che s’à taché le virus HIV. Baldi ne él atualmënter degöna cura, mo al é poscibl da archité le svilup dla maratia cun medejines. „La prevenziun y l’educaziun é fondamentales, deache l’AIDS é tres ćiamò n prigo che ne po nia gnì sotvaluté“, à dit l’assessuria por la sanité Martha Stocker.

Plü funziuns à da śëgn inant l Abo+ por studënć sura i 18 agn: cun l’ativaziun de na funziun de paiamënt aposta saràl poscibl da paié diretamënter cun la cherta dl Abo+ plü sorvisc dl trasport publich local, sciöche por ejëmpl la tarifa por le trasport dla roda y i iadi danter Prener-Desproch o Sanćiana-Lienz.

Tan ćialt co mai denant, dër mol y püch sorëdl: chësc é le ressumé di meteorologs dl Sorvisc Meteo dla provinzia por ći che reverda le tëmp tl mëis de novëmber. Les temperatöres é stades altes tratan döta la sajun da d’altonn che é le secundo altonn plü ćialt dal mëteman dles mosoraziuns dl tëmp.

Colié la fantasia y la pratica cun l’aprofondimënt de n tema d’atualité: Chësta é stada la sfidada dl proiet „Politische Bildung“ che é gnü organisè dal’Intendënza todëscia adöm a chëra ladina, por tlasses dles scores mesanes, altes y profescionales. Le concurs scolastich é rovè incö (27/11) tla fasa finala cun la presentaziun y valutaziun di 8 mius proieć a Balsan.

500 agn te un n liber: Le Museum Natöra à dè fora la pröma publicaziun importanta sön la storia, le svilup y les descurides dla paleobotanica, chël ô dì dl’inrescida de plantes fossiles tla Talia. Le liber é gnü presentè incö, ai 27 de novëmber da Evelyn Kustatscher, öna dles auturies prinzipales y paleontologa tl Museum Natöra.

Le portal internet www.manif.it cöi adöm y presentëia te na manira scëmpla plü sorts de manifestaziuns, dal ćiamp dla cultura, ala musiga y formaziun, che vëgn metüdes da jì tles valades ladines dl Südtirol: incö, jöbia ai 27 de novëmber él gnü presentè le conzet nü dl portal che vëgn sostignì dales Repartiziuns dla cultura todëscia y ladina.