Atualità

L’Ofize Formaziun dl personal sanitar lascia alsavëi che al vëgn conzedü stipendiums por la formaziun de basa che reverda les profesciuns sanitares, sciöche inće i spezialisć y i assistënć tl ćiamp sanitar por l’ann de scora 2014/2015.

En gaujiun di 25 de novëmber, dé internazional cuntra la violënza sön les ëres, él gnü presentè incö, lönesc ai 24 de novëmber n „app por les mitans“, realisada dala Comisciun por l’avalianza dles oportunitês dles ëres y dl Sorvisc Ëra. L’assessuria Martha Stocker dij: „L’app é n contribut important por informè les mitans y les ëres jones sön les sorts desvalies de violënza cuntra d‘ëres."

Aldì les propostes por ciafè impulsc concreć tres n dialogh partezipatif: Chësc le fin dles sëres de discusciun danter plü rapresentanc dl monn dla scora ladina che s’à incuntè da püch a San Martin y a Urtijëi por cöi adöm propostes nöies por le svilup dla scora tl dagnì. „Les idees portades dant sarà la basa por na colaboraziun costanta danter les istituziuns“, insciö l’assessur Florian Mussner.

Cun na grafica daldöt nöia che se adatëia inće ales formes plü modernes dla comunicaziun tecnologica se presentëia da püch le portal internet ladin www.manif.it, olache al vëgn racoiü y publiché les manifestaziuns dles valades ladines dl Südtirol. Le portal nü, sostignì dales Repartiziuns Cultura Ladina y Cultura todëscia, gnarà presentè en jöbia ai 27 de novëmber dales 11 a Balsan.

La Repartiziun Politiches Soziales informëia che al é poscibl por ënć privać y publics che laôra tl setur sozial da fà domanda ćina ai 15 de dezëmber dales 12 por n’antizipaziun dl contribut por l’ativité ordinara dl 2015.

La segonda ancunteda de descuscion sun l svilup dla scola ladina unirà tenida tl’ Aula Magna dl ITE „Raetia“ a Urtijëi y nia tla Cësa de Cultura Luis Trenker. L orar resta l medemo: dala 19.30.

Prësc trëi miliuns de euro mët la Junta provinziala a desposiziun por l’ann 2014 por le finanziamënt dl sorvisc dles umes dl dé. Sön proposta dl’assessuria Waltraud Deeg é la terza pert dl finanziamënt de 1,218 miliuns de euro gnüda aprovada inier (18/11). Les organisaziuns che organisëia le sorvisc d’assistënza po fà domanda por l’antizipaziun dl 85 porcënt dl finanziamënt complessif.

Tl contest dla dejima ediziun de „Junge Solisten am Podium 2014“ él l’orchestra da ćiamena tiroleja che mët a jì dui conzerć ai 30 de novëmber y al 1 de dezëmber tl Südtirol. I partner de cooperaziun dla scomenciadia é les Scores de musiga todësces y ladines adöm cun „Musik Meran“.

La Junta provinziala à tratè incö (18/11) te süa sentada edemala plü tematiches che reverda i seturs dla produziun d’energia, dl turism y dl’assistënza por la pröma infanzia. Insciö él gnü aprové critês nüs por i contribuć ales microstrotöres d’assistënza por l’infanzia, cater conzeć por le svilup turistich (cun piceres mudaziuns) y al é gnü tratè la chestiun dla fujiun danter SEL y AEW.

Na delegaziun cun ghesć d’onur ti à fat vijita incö (18/11) ala Junta provinziala: por le pröm iade à le vësco Ivo Muser vijité, adöm a plü rapresentanć dla Diozeja Balsan-Porsenù, la Junta provinziala. L’ocajiun é gnüda anuzada por tratè danter l’ater plü tematiches che reverda la scora, la solidarieté, la sconanza di bëgns culturai y l’istituziun dla festa de Sant Ojöp siöche dé de festa.