Atualità

Por daidé i scolars y les scolares dla scora mesana da to la dezijiun sön ći scora alta chirì fora él les scores altes, profescionales y i istituć tecnics che mët da jì plü dis dla "porta daverta" y manifestaziuns d’informaziun. Les brosciüres d’informaziun cun dötes les dates é da püch desponibles tres la plata internet dl Ofize orientamënt scolastich.

I rapresentanć dles Consultes provinziales di jogn di trëi grups linguistics s’à incuntè cun l’assessur provinzial por le frabiché abitatif Christian Tommasini y cun i esperć dla Repartiziun frabiché abitatif y dl Istitut por le frabiché sozial por tratè plü propostes por na cultura nöia dl abité.

Aprofondì les competënzes tl ćiamp dl laûr pedagogich tla scolina por sostignì le svilup y l’imparè di mituns y mitans tl’eté dla scolina: chësc é stè un di obietifs prinzipai dla formaziun trienala de 29 educadësses che à stlüt jö da püch la scoraziun „Stärkung und Erweiterung der pädagogischen Handlungskompetenz“. Incö ti él gnü surandè ales maestres y colaboradësses le zertificat de contlujiun.

„Le lingaz obliëia! La scora ladina sciöche model europeich?" – Paul Videsott, professur dla Repartiziun ladina dl’Université de Balsan y Rico Cathomas, Professur de didatica generala, didatica plurilinguistica y mënagrup tl’Université lëdia de Balsan tignarà en jöbia ai 20 de novëmber dui referać tl cheder dla linia „Por ejëmpl la Ladinia“ metüda a jì dala Biblioteca provinziala dla Teßmann.

Indoman, vëndres, pol suzèd che plü ferates toma fora inće tl Südtirol por gaujia de n scioper anunzié dai sindacać de basa tl setur feroviar. I sorvisc de trasport feroviar dla SAD y de Trenitala podarà tomè fora o gnì garantì te intervals nia regolars.

„La Scora tl dialogh!“: Chësc é le moto dles döes incuntades, a chëres che l’assessur por la scora ladina Florian Mussner y l’Intendënt Roland Verra inviëia düć i rapresentanć scolastics y interessà a laurè fora propostes y idees concretes por le svilup dles scores y dles scolines dles valades ladines por le dagnì. Les incuntades é ai 20 de novëmber a San Martin y ai 21 de novëmber a Urtijëi.

Dodoman, en vëndres ai 14 de novëmber gnaràl surandè i zertificać ales educadësses dla scolina che à stlüt jö la scoraziun „Stärkung und Erweiterung der pädagogischen Handlungskompetenz“ tres na manifestaziun de contlujiun dales 15 tla scolina Salieta a Urtijëi en presënza dla referënta Irmgard Jaedicke y dl’ispeturia dles scolines Edith Ploner.

La segurëza di scolars y dles scolares sön le tru da jì vigni dé a scora é stè un di temesc prinzipai dl’incuntada danter l’assessur por la mobilité Florian Mussner y la Garanta por l’infanzia y adolescënza Paula Maria Ladstätter. Trames döes les perts à concordè sön l’importanza dla programaziun y dl’atuaziun de mosöres de proteziun y sensibilisaziun.

Reduziun dla burocrazia, trasparënza y adoranza sostenibla dla ressursa idrica: chisc é i obietifs prinzipai dl dessëgn de lege che ajornëia la regolamentaziun sön les conzesciuns de de pices derivaziuns y de chëres mesanes por la produziun de energia eletrica. La regolamentaziun nöia é gnüda aprovada incö (11 de novëmber) dala Junta provinziala sön proposta dl assessur Richard Theiner.

La Junta provinziala à aprovè n adatamënt di prisc dles chertes y di abonamënć por le trasport local, zënza mudé le prinzip dl sistem tarifar dl "Südtirol-Pass": chi che anüza deplü i mesi dl trasport publich, paia demanco. I aumënć reverda dandadöt chi che anüza püch sü abonamënć, chi che i adora gonot paiarà tan co śëgn. Por scolars y seniors saràl da paiè ite na cuota anuala.