Atualità

Sön le iade tla Galizia é da incö, jöbia ai 16 d’otober 400 studënć da döta l’Euregio Südtirol-Tirol-Trentin por jì a recordè i avenimënć tragics dla Pröma vera mondiala y sües conseguënzes. Al tolarà pert al iade inće la cuinta tlassa dla scora alta dl ITE da La Ila. Le grup é gnü saludé incö söl Prener dai Presidënć Kompatscher y Platter y sarà sön le iade ćina ai 21 de otober.

L’assessuria Martha Stocker à presentè incö danmisdé (ai 16 d’otober) te na conferënza stampa tl Palaz Widmann a Balsan le ressumé dles incuntades dles ultimes edemes cun i colaboradus y rapresentanć di raiuns sanitars te düć set i ospedai dl Südtirol y cun les perts soziales y les organisaziuns di paziënć por ći che reverda i „Orientamënć nüs dl’assistënza sanitara tl Südtirol".

Le Ćiamp Inovaziun y Consulënza à n Diretur nü: Felix Ploner à surantut da püch la direziun dl Ćiamp Inovaziun y Consulënza, na istituziun che se crüzia danter l’ater dl svilup pedagogich y didatich dl’insegnamënt tles scores ladines (p.e. cun publicaziuns nöies) y dl’aministraziun scolastica. Da püch él gnü tignì la pröma incuntada cun l’assessur por la scora ladina Florian Mussner.

Na Provinzia plü moderna y buna da adorè les ressures te na manira efiziënta: chisc é i obietifs dl prozès de reorganisaziun dl’Aministraziun publica dla Provinzia. Le segnal de start dl proiet „Inovaziun aministrativa 2018“ é gnü dè incö, mercui ai 15 d’otober dal’assessuria por l’aministraziun Waltraud Deeg y dal diretur general Staffler. Trëi agn s’à la Provinzia dè tëmp por realisé le proiet.

Cun n „pat de garanzia“ à le Presidënt dla Provinzia stlüt jö incö (15/10) a Roma les tratatives danter le Govern y la Provinzia por le finanziamënt dl’autonomia tl dagnì.„I ùn stabilì na soma fissa sciöche contribut de partezipaziun al ressanamënt dl bilanz statal por impedì insciö al Stat da se tignì suraprò ressurses finanziares suplementares che ti speta ala Provinzia“, à sotligné Kompatscher.

20 jones y jogn, 10 dal Südtirol y 10 dal Trentin danter i 17 y i 22 agn podarà fà para dai 15 ai 25 d’agost dl 2015 al barat intercultural a Rabat tl Marocco cun jogn dla medema eté dal Marocco. La scomenciadia à inom „HalloCiaoMaroc“ é vëgn organisada dal Ofize Laûr por y cun la jonëza dla Repartiziun Cultura todëscia en colaboraziun cun les assoziaziuns OEW y BASSMA (Marocco).

Dodoman, vëndres ai 17 d’otober gnaral tignì le Dé dla Cultura Ladina dales 15 tla Ćiasa dla Cultura „Luis Trenker“ a Urtijëi. La tematica zentrala é l’aniversar de 75 agn do le mëteman dla perioda dles opziuns tla Ladinia y tl Südtirol y sües conseguënzes por le svilup tles valades ladines. La manifestaziun vëgn organisada dal Assessorat por la scora y cultura ladina.

La Juntà à conzedü incö (14 d’otober) le pest por l’archirida y le pest por la sciënza dl Südtirol por le 2014. Le Pest por la sciënza é jü a Markus Ralser, le Pest por l’archirida a Evelyn Kustatscher. La Junta à implü aprovè 2,75 miliuns de euro sciöche compensaziuns ambientales, l’istalaziun de n raiun de sconanza incër le mür dla cité de Glurns y le conzet „Inovaziun dl’Aministraziun 2018".

Cun le scomenćiamënt dl 2015 sarál poscibl da fà domanda por n imprëst por la costruziun, cumpra o recuperada dla ćiasa de proprieté tres la soma sparagnada y metüda da pert te n fonds de ponsiun: La Junta provinziala à aprovè insciö incö (14/10) i critêrs de adejiun y i proscimi vari por l’atuaziun dl model Bausparen.

Les conseguënzes dl ri tëmp da plöia tratan l’isté é gnüdes tratades incö (14/10) dala Junta provinziala tla sentada edemala. „Cun la cuantité de plöia che é gnüda jö chësc istè ne él nia stè poscibl te n gröm de caji da sié i prà da munt y da mët a sëcié le fëgn, insciö unse tut la dezijiun da compensè i paurs por i danns“, à dit le Presidënt Kompatscher. La compensaziun é de 150 euro por hectar