Atualità

L’assessuria por la sanitè y les politiches soziales Martha Stocker à presentè les diretives por n orientamënt nü dl’assistënza sanitara ales colaboradësses y ai colaborauds ti ospedai di raiuns sanitars te döt le Südtirol. L’assessuria portarà dant en jöbia, ai 16 d’otober dales 10 tl Palaz Widmann n ressumé dles incuntades y di proscimi vari.

Da en mercui, ai 15 d’otober inant saràl poscibl da rezepì tres la trasmisciun digitala indöt 33 programs radio dla RAS, dla Rai y de emitënć radio privać. L’ampliamënt di programs y dla rezeziun é gnü inauguré ofizialmënter incö (13/10) dal Presidënt Arno Kompatscher cun l’ativaziun dl implant de trasmisciun nü por le radio digital tla sënta dla RAS a Balsan.

91 scores te döt Südtirol cun indöt 2139 scolars (1036 mitans y 1103 mituns) à fat para tl 2012 al’inrescida PISA-OCSE. Por la scora paritetica dles valades ladines él preodü n’incuntada de presentaziun di dać dl 2012 y de formaziun por le stüde dl 2015 ai 20 d’otober dales 15 tl Istitut Tecnich Economich a Urtijëi cun l’espert Roberto Ricci.

N register de tlassa completamënter digital: l’informatich Stefan Raffeiner à presentè inier (ai 9 d’otober) al’assessuria por l’informatica Waltraud Deeg chësta idea. Por Deeg é chësc n“proiet da sostignì y da valuté por ći che reverda l’aplicabilité tecnica y informatica“.

Ai 16 d’otober piarà ia la ferata por la Galizia, n iade por jì a descurì y capì i avenimënć che ê sozedüs dan da apresciapüch 100 agn tratan la perioda dla Pröma vera mondiala. I studënć che tolarà pert al iade sarà söporjö 400 dales trëi provinzies dl’Euregio. Inier (09/10) s’à incuntè la grupa di studënć südtirolej a Porsenù por n’incuntada de preparaziun.

N vare inant é gnü fat incö (ai 9 d’otober) dal Presidënt Kompatscher tratan l’incuntada cun le Secretêr de Stat Delrio a Roma por ći che reverda les tratatives danter le Stat y la Provinzia por modaziuns al finanziamënt dl’autonomia. „I sun tres plü daimprò a n’acordanza, mo les convenziuns verbales messarà ćiamò gnides metüdes por scrit por s’incuntè proscima edema“, à comentè Kompatscher.

Presentè le proiet dl Govern „La Buona Scuola – Facciamo crescere il Paese“ y ascutè sö les propostes y i impulsc di rapresentanć dl monn dla scora dla Talia: chisc é i dui obietifs prinzipai dl tour dla Ministra por l’istruziun Stefania Giannini che à metü man incö (09/10) cun na vijita a Balsan.

En sabeda, ai 11 d’otober 2014, vëgnel organisé por le terzo iade le Dé internazional dles mitans. La scomenciadia é gnüda metüda a jì dales Naziuns Unides tl 2011, l’assessuria competënta Martha Stocker y la Presidënta dla Consulta por l’avalianza dles oportunitês Ulrike Oberhammer anüza chësta ocajiun por recordè l’importanza da sostignì les mitans te so svilup por plü independënza y autostima.

Aprofondì le conzet de na buna aministraziun, garantì prozesc efiziënć y n’adoranza prezisa dles ressurses y ofrì sorvisc de cualité: chisc é i obietifs dl proiet „Aministraziun inovativa 2018“, che sarà al zënter de na Conferënza danter le Presidënt Kompatscher, l’assessuria Deeg y le Diretur general Staffler ai 15 d’otober a Balsan.

La Repartiziun Frabiches y sorvisc tecnich inviëia por le 13ejimo iade a n seminar sön l’architetöra. La tematica zentrala sarà chësc iade le conzet de „corporate architecture“. La manifestaziun, che é ponsada dandadöt por architëć, injiniers y tecnics, vëgn inaugurada en mercui, ai 15 d’otober tla sënta dl’Université da Balsan dales 9 dal assessur por i laûrs publics Christian Tommasini.