Atualità

„I messun ciafè la dërta combinaziun de mosöres y provedimënć por la coesistënza dl svilup economich cun la sconanza dl ambiënt y la segurëza di zitadins.“ Cun chëstes parores à inaudé l’assessur Arnold Schuler le Laboratore Dolomites, n’incuntada de cater dis cun discusciuns sön l’ega sciöche tematica zentrala.

Incö (25/09) él gnü fat „n vare important“ por ći che reverda la prorogaziun dla conzesciun por l’autostrada dl Prener (A22) dal Presidënt dla Provinzia Arno Kompatscher y dal Presidënt dl Trentin Ugo Rossi tratan l’incuntada a Roma cun le Minister dles Infrastrotöres Lupi. Al é inće gnü definì plü avisa le co-finanziamënt dla sozieté dl’A22 por la realisaziun dl BBT y dles trates d’azès.

La conferënza stampa sön l’„Agenda Digitala 2020“ preodüda por indoman (26/09) é gnüda antizipada de 30 menüć. L’assessuria Waltraud Deeg presentarà insciö le program indoman, ai 26 te setëmber te na conferënza stampa a Balsan dales 10, impede che dales 10.30.

La formaziun y l’ocupaziun é al zënter dla cuinta ediziun „Fiera dla Formaziun Futurum 2014“ dai 2 ai 4 de otober tla sënta dla Fiera a Balsan. La fiera é gnüda presentada incö, jöbia ai 25 de setëmber dai trëi assessurs provinziai por la scora Florian Mussner, Philipp Achammer y Christian Tommasini y ofrësc a scolars y geniturs na suraodüda generala sön le monn dla formaziun y dl laûr.

Se scrì ite ai ejams de bi- y trilinguism é tres plü saurì y asvelt: la pröma novité é gnüda ativada de novëmber cun la poscibilité da stlü jö les prozedöres d’iscriziun online cun la Chërta di sorvisc, la secunda novité gnarà arjignada ca por le proscimo mercui, ai pröms de otober: la Chërta di sorvisc podarà insciö gnì ativada da chël dé inant diretamënter tl Sorvisc Ejams bi- y trilinguism.

La Junta provinziala à aprovè incö (23 de setëmber) na seria de mudaziuns al program dles mosöres de compensaziun ambientala por la costruziun dl tunel de basa dl Prener te cater comuns: Franzensfeste, Freienfeld, Pfitsch y Vahrn. Danter les novitês él la realisaziun dla ligna dla tenjiun alta sot tera y n stüde de fatibilité dla varianta de Riga („Riggertalschleife“).

A Bornech gnaràl realisé n palaz dla dlacia nü. Le finanziamënt por la realisaziun dl frabicat nü é gnü aprovè incö (23 de setëmber) dala Junta provinziala. „Insciö saràl inće Bornech che arà n palaz dla dlacia modern“, à splighé l’assessur por i laûrs publics Christian Tommasini.

Cun n aumënt dles ressurses finanziares de 30 miliuns de euro gnaràl smendris i tëmps de speta por finanziamënć ti seturs dl frabiché abitatif y dl’economia. Chësta dezijiun é gnüda tuta incö (23 de setëmber) dla Junta provinziala che à partì sö te plü capitui i finanziamënć che vëgn dai fonds dla Regiun.

L’impëgn dla Provinzia por portè l’internet aslöm sön döt le teritore dl Südtirol va inant. Por amplié l’azès dles families y dles dites ai colegamënć internet sigüsc y asvelć à la Junta provinziala aprovè incö (ai 23 de setëmber) l’aumënt dl finanziamënt dl’ativité dla RAS (Rundfunkanstalt Südtirol) da 10 a 20 miliuns de euro por la realisaziun dles infrastrotöres por l’internet asvelt.

Les poscibilitês de na colaboraziun tl setur dl pröm aiüt é gnüdes analisades inier, lönesc ai 22 de setëmber, tratan na vijita ala Zentrala dl Pröm Aiüt da Desproch („Leitstelle Tirol“) da pert dl assessur por la proteziun zivila Arnold Schuler y dl assessur dl Land Tirol Josef Geisler.