Atualità

I orientamënć nüs dla sanité südtiroleja sarà al zënter de na conferënza stampa organisada dal’assessuria por la sanité Martha Stocker en vëndres, ai 26 de setëmber dales 11.30 tla curt interna tl Palaz Widmann a Balsan.

Por svilupé inant la musicalité y l’interculturalité di scolars dles scores elementares y dla scolina él gnü presentè incö, lönesc ai 22 de setëmber a La Ila le material didatich nü “Le planët sona y ćianta” dal Intendënt por la scora ladina Roland Verra adöm ai auturs Paolo Vinati y Susy Rottonara.

Le Presidënt dla Provinzia Arno Kompatscher y l’assessuria por l’aministraziun Waltraud Deeg s’à incuntè incö (23 de setëmber) cun i rapresentanć di sindacać y di daturs de laûr por stlarì i proscimi vari por ći che reverda l’inovaziun dl’aministraziun. Tl zënter dla discusciun él stè la nominaziun de na comisciun, che dess inće ester la fondamënta por la reorganisaziun dl bilanz provinzial.

439: Chësc é por le momënt le numer dles traduziuns dla „Detlaraziun Universala di Dërć dles Porsones“ (Universal Declaration of Human Rights: UDHR), detlaraziun storica dles Naziuns Unides (ONU) y un di documënć plü significatifs por ći che reverda i dërć dles porsones. La verjiun plü nöia é chëra ladina (idiom dla Val Badia).

Na vijita al zënter cultural dl Grand Hotel de Toblach, n retrat dla returia dl’Univeristé da Trënt aria De Pretis, na comparaziun dl’Euregio cun d’atres 45 euroregiuns: chisc é i temesc dl mëis presënć sön la homepage dl’Euregio Südtirol-Trentino-Tirol y da ciafè online sön: www.europaregion.info

Por definì i proscimi vari y les strategies dl percurs dla digitalisaziun tl Südtirol à la Provinzia de Balsan metü adöm le program „Agenda Digitala 2020“ che gnarà presentè dal’assessuria Waltraud Deeg ai 26 te setëmber te na conferënza stampa a Balsan.

Rudolf Nocker da Sëlva é dai 13 de setëmber sön le iade cun süa ćiavala Quarter Soraya por vijité düć i nü raiuns dles Dolomites che fej pert dla fondaziun UNESCO. Le percurs dl iade fej fora indöt 700 chilometri amesa la natöra, les munts y la contrada dles Dolomites. Do avëi vijité inier (18/09) le Geoparc Bletterbach a Aldein passarà le trù tres Funès ćina Al Plan.

Por ti dè na sbürla al dialogh tl ćiamp dl integraziun à l’assessur provinzial Philipp Achammer metü a jì na seria d’incuntades por mët sö na rëi de colaboraziun danter Provinzia, Comuns y Comunitês Comprensoriales. Le fin é chël da realisè n’acordanza sön les chestiuns che reverda l’integraziun. La pröma incuntada é gnüda tignida cun i referënć por l’integraziun di Comuns tl raiun de Balsan.

L’ediziun de chësc ann dla Fiera dla Formaziun – Südtirol „Futurum 2014“ gnarà organisada dai 2 ai 4 de otober. Le program dl’incuntada danter le monn dl’educaziun cun i scolars, geniturs y le personal didatich gnarà presentè te na conferënza stampa ai 25 de setëmber a Balsan dai assessurs provinziai por la scora Florian Mussner, Philipp Achammer y Christian Tommasini.

Portè a plü segurëza sön strada y a n’adoranza costanta dla mobilité ecologica: Chësc é le fin dla campagna de sensibilisaziun „S.O.S.Zebra!“ che é gnüda presentada incö tl Palaz Widmann dal assessur por la mobilité Florian Mussner y dal assessur por la scora y cultura todëscia Philipp Achammer.