Atualità

En ocajiun dla festa dla cité vedla (Altstadtfest) de Porsenù la proscima fin dl’edema dai 22 ai 24 de agost vëgnel organisé n sorvisc de trasport aposta da y por Porsenù dales localitês dlungia la cité.

La situaziun atuala y i svilups tl dagnì dla colaboraziun tl setur dla sanité danter la Provinzia de Balsan y le Land Tirol é stà al zënter dl’incuntada ai 18 de agost danter l’assessuria por la sanité Martha Stocker y l’assessur dl Land Tirol Bernhard Tilg adöm cun rapresentanć y direturs di ospedai y dla sanité dl Tirol (Tilak).

Les deliberaziuns por ći che reverda le „bonus energia“ nü aprovades ai 5 de agost dala Junta provinziala y les diretives nöies sön l’efiziënza energetica di frabicać é gnüdes publicades incö (mertesc, ai 19 de agost) tl Boletin ofizial dla Regiun y jarà en forza indoman.

Por merit di contribuć por le ressanamënt dl ambiënt che vëgn paià fora dal’aziënda SE Hydropower Srl, che à en gestiun 10 implanć idroeletrics tl Südtirol, po i Comuns interessà y la Provinzia finanzié tres investimënć de plü proieć de mioramënt dl ambiënt y dla contrada.

Teatri scolastics y n concurs artistich: döes é les scomenciadies che la Repartiziun Cultura y Scora Ladina metarà a jì, adöm cun la Consulta Provinziala por le grup linguistich ladin, por l’aniversar dl scomenciamënt dla pröma vera mondiala tl 1914, che à portè cun l’ingrès te vera dla Talia tl 1915 a combatimënć amesa les Dolomites. Tl zënter dles scomenciadies saràl i scolars y i artisć.

Ai 5 de setëmber, Dé dl’Autonomia, vëgnel chësc ann organisè na scomenciadia particolara: la Provinzia mët insciö a jì por chësta ocajiun n Dé dla Porta daverta, tratan chël che düć i interessà po ti dè n’odlada al’aministraziun publica y ales ativitês da vigni dé ti ofizi publics dla Provinzia. La plata internet cun dötes les informaziuns sön le Dé dl’Autonomia é da püch online.

Vera, terorism, jënt che mëss s’un sciampè y lascè sües ćiases y abitaziuns: la popolaziun tl Irak y tla Siria é tl zënter de conflić violënć cun conseguënzes tragiches por la jënt sön le post. La Provinzia de Balsan à metü a jì te trami dui i Stać proieć d’aiüt, che dess dandadöt portè aiüt ai mituns y ai jogn de families sciampades dala vera.

La Junta provinziala ti à menè inant al Consëi provinzial cater dessëgns de lege omnibus. Denant che chisc vëgnes debatüs tles comisciuns legislatives, arà les perts soziales la poscibilité da té posiziun sön i dessëgns de lege te n’incuntada cun la Junta provinziala ai 22 de agost.

Ai 20 y ai 21 de setëmber vëgnel organisé da Pixcube.it y Nikon en colaboraziun cun l’Ofize Parcs naturai n laboratore fotografich tl Parch natural Fanes-Senes-Braies. „Les fotografies“, spliga Renato Sascor, responsabl dl Parch natural Fanes-Senes-Braies „nes mostra la belëza dla contrada y aumentëia insciö la sensibilisaziun por le respet por la natöra.“

Vire n dé tl’eté medievala: Chësta esperiënza ti vëgn pitada por un n dé ai vijitadus dl Museum storich – cultural dla Provinzia de Ćiastel Tirol ai 17 de agost. Tratan la manifestaziun gnaràl insciö fat do scenes dla vita medievala sciöche combatimënć danter ćiavaliers y jori de falć. An podarà ascutè sö musiga medievala y ćiarćé rezëtes dl’eté danter l’antichité y la modernité.