Atualità

La Fondaziun Dolomites Unesco mët da jì por l’isté 2014 la pröma ediziun dl Labfest dles Dolomites Unesco dai 5 ai 7 de setëmber a La Val. Le festival ti dedichëia süa pröma ediziun al tema da munt dl "sié", che gnarà presentè te sü aspeć plü desvalis adoran formes jornalistiches, artistiches y musicales.

„Chi che investësc tl mioramënt energetich di frabicać, sura i standarg dà dant fora, vëgn recompensà“: chësc é le messaje dl assessur por l’energia Richard Theiner por ći che reverda la regolamentaziun nöia dl bonus energia che é gnüda arprovada dala Junta inier tratan süa sentada edemala. L’assessur Theiner à splighé incö (6 de agost) a Balsan plü avisa i mudamënć preodüs dal regolamënt nü.

Bele tl’eté romana êl na strada che passâ tres la Val de Puster y che ê un di coliamënć de transiziun prinzipai amesa les Alpes. Da püch él gnü ciafè sön la trata antica dla strada romana cater peres miliares dlungia la localité de Vintl de Sura y che gnarà presentades dal Ofize Bëgns archeologics en dodoman, vëndres ai 8 de agost a Frangart.

Le Stat damana na compensaziun dles mëndres entrades tl cheder dla cuta sön i imobiliars (IMU), la Provinzia constatëia na violaziun dla spartiziun dles competënzes. La Junta provinziala à insciö tut incö (ai 5 de agost) la dezijiun da contestè le decret dl Minister por l’Intern dan da la Curt costituzionala.

La revijiun dles spëises atuales porta a n smendrimënt important di cosć tl’aministraziun publica: incö (05/08) ti él gnü presentè ala Junta provinziala le raport dla comisciun competënta por le sparagn di cosć por l’ann 2013 che à registré n superamënt dla soma de sparagn preodüda (4,04 miliuns de euro).La Provinzia sparagna indöt 5,76 miliuns de euro, 40 porcënt deplü co dè dant dales previjiuns

Co ćiara pa fora le dagnì dla Regiun Europeica dl’Euregio? Chësta é öna dles domandes zentrales a chëres che an ti jarà do a mez agost tratan le forum europeich a Alpach. La Junta provinziala à incö, mertesc ai 5 de agost aprofondì la tematica sön le svilup dl’Euregio tratan süa sentada edemala.

N vare important devers l’efiziënza energetica é gnü fat incö por mirit dla deliberaziun dla Junta dla Provinzia sön la conzesciun dl "bonus energia". L’assessur Richard Theiner presentarà indoman, mercui ai 6 de agost, la regolamentaziun nöia, stabilida dala Junta, tratan na conferënza stampa.

Indöt 100 miliuns de euro investësc la Provinzia de Balsan chësc ann por le sostëgn dl’archirida y dl’inovaziun. „Nos odun chisc dui ćiamps sciöche fondamentai por nosc svilup“, à dit le Presidënt dla Provinzia, Arno Kompatscher, tratan la sentada da incö (ai 4 de agost) cun le Consëi por la sciënza y l’archirida, tratan chëra che al é inće gnü tut la dezijiun da scrì fora dui concursc nüs.

L’assessuria por la familia Waltrad Deeg à presentè incö (ai 4 de agost) tla scolina de St. Johann a Balsan i resultać dles incuntades cun i rapresentanć dles families te de plü posć dl Südtirol. Danter l’ater él gnü portè dant na relaziun sön la situaziun atuala dla politica familiara sciöche inće sön le laûr di proscimi mëisc.

La mendranza linguistica zimbra tl Trentin, le pianist jazz tirolesc Christian Wegscheider y la diretiva nöia dl UE por i consumadus: chëstes é les trëi tematiches dl mëis de agost da lì do sön le portal internet dla Regiun Europeica Tirol-Trentin-Südtirol.