Atualità

La proposta operativa dl Program "Investimënć por la chersciüda y l’ocupaziun" dl Fonds europeich por le svilup regional FESR 2014-2020 por le raiun südtirolej ti é gnü ortié inant ala Comisciun europeica. Al é preodü investimënć por zirca 136 miliuns de euro.

De plü aziëndes, de plü lauranć dependënć, de plü impiegać tl setur publich y ćiamò de plü volontars: chisc é i resultać dl nono censimënt sön l’industria, sön i sorvisc y sön les istituziuns zënza profit dl Südtirol. Les zifres finales é gnüdes presentades incö (24 de messè) a Balsan dal’Istat y dal’Astat. Le Presidënt dla Provinzia Arno Kompatscher à alzè fora dandaldöt le svilup tl volontariat.

Na vijita demorvëia à ciafè incö (mercui ai 23 de messè) i 60 jogn y mituns che é atualmënter al’Euregio Summer Camp tla Ćiasa dla Cultura a Neustift. Le Presidënt dla Provinzia, Arno Kompatscher, à vijité incö i jogn presënć al camp y à albü na discusciun cun vëi sön le tematiches plü desvalies dl’Euregio y dl Südtirol.

Le mantignimënt dla competitivité y dla vitalité ti raiuns rurai tl Südtirol sciöche inće l’adoranza sostenibla dl teritore: Chisc, à sotligné l’assessur Schuler, é i fins dl program nü por le svilup tl raiun rural. Inier, mertesc ai 22 de messè, ti à l’Ofize Fonds strotorai UE tl’agricoltöra dè inant le program por i proscimi sis agn ala Comisciun Europeica.

La consulta provinziala competënta à aprovè da püch le sostëgn por indöt 40 proieć por la cooperaziun al svilup de organisaziuns dl Südtirol sura döt le monn: tl’Africa, tl’America zentrala y dl süd, tl’Asia y tl’Europa dl ost. I seturs, olache la Provinzia de Balsan à confermè so sostëgn, é dandaldöt: l’agricoltöra, l’educaziun, l’ega, la sanité y la proteziun dles mendranzes.

Do n’edema de palsa à la Junta provinziala albü incö (22 de messé) n gröm de punć sön l’ordinn dl dé. Insciö él gnü tratè danter l’ater na seria de mudaziuns al plann urbanistich, la presentaziun dl proiet Euregio-Lab al Forum Alpach ai 17 de agost y la redestribuziun di contribuć dal fonds sozial europeich.

Por ći che reverda la reforma dla Costituziun cun la mudaziun dl Titul V y la repartiziun nöia dles competënzes danter le Stat y les istituziuns locales à la Provinzia de Balsan determiné sciöche la priorité plü alta l’assiguraziun dl mantignimënt dla tlausola de proteziun.

La gran domanda do les antizipaziuns, conzedüdes dala Provinzia sciöche n imprëst sön la restituziun dles cutes preodü dal Stat por le ressanamënt de ćiases d’abitaziun privates, devënta tres plü alta.

La Facoltè de Sciënzes dla Formaziun dla Université Lëdia de Balsan, cun sënta a Porsenù, ofrësc en colaboraziun cun les repartiziuns todësces, talianes y ladines dl’istruziun y dla formaziun dla Provinzia n curs de formaziun profescionala por l’insegnamënt dl lingaz inglesc tla scora primara dl Südtirol. Les domandes po gnì presentades ćina ai 19 de agost dl 2014.

Le zënter de documentaziun sot al monumënt dla vittoria é gnü daurì incö (ai 21 de messè) a Balsan. „Cun chësta daurida devënta le monumënt dla vittoria azessibl por düć, y vëgn insciö delibré da so pëis ideologich“, à splighé incö le Presidënt dla Junta, Arno Kompatscher, che à ajuntè, che le monumënt vëgn inserì cun chësc at te n contest storich, le proscimo vare sarà spo la normalisaziun.