Atualità

77,7 percënt di zitadins cherdei ala veles, 289.766 persones, à ncuei dat ju si stima per l Cunsëi provinziel nuef de Buslan. Paredlan chësta perzentuela al’ultimo iede, dan cin ani, ie chësc n manco 2,4 ponc de percënt. Ti chemuns ladins à lità l 79,3 percënt, che ie 3,5 ponc de manco che dan cin ani.

83.388 ie ncuei danmesdi, nchin la 11.00, stai a dé ju si usc per la lites provinzieles 2013. Chësc fej ora l 22,4 percënt de chëi che ie cherdei a lité y a chësta maniera 0,8 ponc de manco perez a dan cin ani. Ti chemuns ladins à nchinamò lità l 23,6 percënt.

Duta la pertes nteressedes al stritoz dl strom tla Venuesta à (NCUEI) ai 25 de utober laudà l ruvé a una sciche n bon cumpromis. I scioldi per l ambiënt ie bele unic nviei via ai trëi chemuns nteressei Laas, Martell y Latsch. A n’acurdanza de mascima iesen nce ruvei n cont dla cunzescion y l mené dla zëntrela Laas/Martell y dl sëurantò dla rë dal strom.

L cunsëi provinziel nuef vën lità n dumënia 27 de utober. La sëntes de vela gëura dala 6.00 y l puderà unì lità nchin dala 22.00. Lunesc da duman uniral scumencià a cumpedé ora la ujes y la cumpëides puderan udëi do y do tres internet. Dut l partimënt basite dl palaz Widmann a Bulsan sarà dedica al zënter media.

Al n’é plü nia che sta te tru ala realisaziun dl Zënter bibliotecar nü. Ai 23 d’otober à le Presidënt dla Provinzia Luis Durnwalder y l’ombolt da Balsan Luigi Spagnolli presentè le proiet cultural y sotescrit l’acordanza che regolamentëia i raporć de spersa y de proprieté danter la Provinzia y la Cité de Balsan. Śëgn pol gnì dè la conzesciun da frabiché y, sciöche al pê ćiamò chëst ann, déssel gnì scrit fora i laûrs de demoliziun di frabicać da śëgn.

N dumënia, 27 de utober vëniel lità l Cunsëi provinziel nuef. La sëntes de vela sarà daviertes dala 6.00 ala 22.00, n pratica puderan lité da ntëur la 7.30 inant. A na maniera che duc i zitadins posse se nuzé dla modaliteies de vela, iel bel śën duta la nfurmazion sun la lites provinzieles online. Sibe la nfurmazion danora, che la plates web cun i resultac, ie unides anjeniedes te trëi rujenedes. Per l prim iede saral pra i resultac nce na sezion dedicheda ai chemuns ladins.

400.958 zitadins dl Sudtirol puderà n dumënia, 27 de utober lité l Cunsëi provinziel nuef. De chisc nen iel 27.908 che puderà lité tres lëtra. A chësta maniera ie la cumpëida di zitadins cun dërt de vela auzeda de 13.162 permez ala veles dan cin ani.

N dumënia che vën vëniel lità l Cunsëi provinziel nuef, ma bele śën possen udëi co che cëla ora la zedula de vela che i zitadins giaterà ai 27 de utober. Sun la zedula iel i simboi dla 14 listes y cater risses uetes per la stimes de preferënza. Ti luesc ladins uniral spartì ora na zedula scrita tla trëi rujenedes.

En domënia ai 27 d’otober dales 13.30 gnaràl tignì tl Museum Ladin Ćiastel de Tor a San Martin de Tor le gran batadù, metü a jì en colaboraziun cun l’Uniun di stödafüch da San Martin. Les iscriziuns é bele davertes.

Le rëi de coliamënć por l’internet aslöm tla Val Badia va inant n vare al iade. Chisc dis vëgnel stlüt jö i laûrs sön le tòch danter Longega y Picolin. I ros por l’internet aslöm sön chësc tòch é gnüs realisà te na colaboraziun straordinara danter l’Assessorat ai Laûrs publics y l’Ispetorat forestal da Bornech.