Atualità

Tla scoles elementeres de rujeneda tudëscia vëniel cris 40 nsenianc de talian sciche segonda rujeneda. L cuncors aldò ie (NCUEI) ai 23 de setëmber unì publicà tla Gazëta ufiziela. Nteressei possa se nunzië nchin ai 23 de utober.

L svilup tl raion dla Dolomites sciche arpejon mundiela, ciunes che sarà la sfides y la pusciblteies che pieta l recunescimënt da pert dl’Unesco sarà argumënt de descuscion pra la “Expo delle Dolomiti” a Longarone tl Belun. Partner de chësta fiera ie la Fundazion Dolomites-Unesco che prejënterà la fiera n mierculdi, 25 de setëmber a Bulsan.

La pusciblteies per i chemuns de cumpré prudoc da tlo, l program naziunel per to su muciadives y la cunsciderazion de me na pert di paiamënc per la cura de mëndri ie states la dezijions dla Jonta provinziela de majer nteres che l Presidënt dla Provinzia à cunedì (NCUEI) ai 23 de setëmber tla cunferënza stampa do la senteda.

Tla Provinzia de Bulsan uniral da cajo a cajo tëut la dezijion sun la cumpëida de muciadives da tò su. Chësta posizion ie unida cunedida (NCUEI) ai 23 de setëmber do avëi refudà l program naziunel SPRAR. Tla medema senteda à i assessëures provinziei fat ora che i paiamënc provinziei per la cura de mëndri vën me n pert calculei sciche davani.

Nce sce i chemuns muessa se tenì ala regules naziuneles per cumpré prudoc y servijes, possel zënz’ auter unì tenì cont dla firmes da tlo. Chësc ie unì stlarì (NCUEI) ai 23 de setëmber tla senteda dla Jonta provinziela deberieda cun i esperc dl’agenzia nueva per ncëries publiches, n cont dla roba da maië.

La vita culturela che tën su la mendranza ladina y la ulentà de vester ladins possa me jì inant, sce nce nce la junëza va chësta streda: chësc ie stat l pensier zentrel che à giaurì l Di dla Cultura Ladina (NCUEI DOMESDI) ai 20 de setëmber tl palaz Widmann a Bulsan. Ntan chësc domesdì ie respunsabli istituzionei y truep jëuni jic plu sot ala tematica dl raport danter jëuni y cultura. Te chësc cuntest iel nce unì tratà i jëuni tl mond di social networks.

La dlacia dl permafrost y si cunseguënzes sun l’eghes tl ejëmpl dl Lech dl Dragon sun Mëisules ie l argumënt zentrel de na sëira de film, n vënderdi ai 20 de setëmber te Sëlva. L escurscion al Lech dl Dragon ududa dant per la sada ai 21 à messù unì desdida.

L Assessorat provinziel Ladin dedichea l domesdì de duman, vënderdi 20 de setëmber, al raport jëuni - cultura. Chësc argumënt sarà zënter dl tradiziunel “Di dla Cultura Ladina”. Tl palaz Widmann a Bulsan uniral deberieda cun l Presidënt dla Provinzia y l assessëur ladin jit do ala dumanda co che la cultura muev i jëuni y co che i jëuni muev la cultura. Te n referat uniral tratà i jëuni y l mond di social network.

Chëst ann à 61 jëuni fat ejam de stat y nsci finà via la scoles autes ladines: n’arjonta che l’Assessorat provinziel Ladin à ulù festejé deberieda cun i jëuni che ie ruvei a n mumënt de si vita, te chël la se trata de tò dezijions mpurtantes. Chësta ucajion ie unida zelebreda (NSNUET) ai 13 de setëmber tl zënter dla scoles autes a Urtijëi.

Ai 12 de setëmber él gnü istituì la comisciun dles lîtes cun l’inćiaria da controlè che les lîtes provinziales di 27 d’otober vëgnes tignides regolarmënter. Bele pro süa pröma sentada s’àra dè jö da öna na pert cun les condiziuns por eserzité le dërt de lîta passif y dal’atra cun le dërt de lîta por corespondënza.