Atualità

Do la paussa da instà y na senteda plu curta curta dl solit, jirà n lunesc, 2 de setëmber inò inant l ritm dla cunferënzes stampa dla Jonta provinziela. Do la senteda prejenterà l presidënt Luis Durnwalder dala 12.30 la dezijions plu mpurtantes da pert dla Jonta.

Incër 500 scolars y 220 insegnanć y le personal aministratif po jì ite la proscima edema tla sënta nöia dla scora alberghiera a Bornech. Le presidënt dla Provinzia Luis Durnwalder, l’assessur por i laûrs publics Florian Mussner y l’assessuria por la formaziun Sabina Kasslatter Mur ti à surandè (INIER), ai 29 d’agost la tle dla frabica scolastica nöia ai anuzadus.

Ti ultimi cin agn à le Parch natural Fanes-Senes-Braies albü n svilup che po rapresentè n ejëmpl paradigmatich de valorisaziun teritoriala sostenibla. N dat important: l’oferta dl trasport publich danter Al Plan y Pederü dl 2008 é gnü cin iadi maiù - acompagnada da n svilup contestual dla domanda. Assessur Widmann "Colià svilup turistich y mobilité che tëgn cunt dl ambiënt".

Aldò de na norma nueva possa nsenianc dla scoles elementeres, mesanes y autes che à bele nsenià trëi ani fé pea n curs speziel a na maniera da giapé l’abilitazion a nsenië. La dumandes per i cursc che reverda la scoles ladines muessa unì dates ju nchin ai 25 de setëmber.

Ala populazion di luesc ladins ti vëniel da śën metù a desposizion previjions dl tëmp plu spezifiches per si raion. L Servisc meteo dla Provinzia de Bulsan pieta da (NCUEI) ai 28 de agost nce previjions meteo per l raion ladin. “Chësc servisc nuef recunësc i luesc ladins y ti dà tl medemo mumënt prejënza ala mendranza ladina tl servisc provinziel plu nuzà” nscì l assessëur Florian Mussner.

Dan che scumëncia l ann de scola nuef, se anconta i respunsabli y culaburadëures dla scoles ladines n merdi che vën, ai 3 de setëmber per n danmesdì de ajurnamënt y de cuntat danter valedes ladines. L Di dla Scola Ladina vën chëst ann tenì tla scola elementera de Urtijëi. Chësc di de cunferënza unirà giaurì cun rujenedes dl assessëur ladin Mussner y dl ntendënt Verra. Ntan chësc danmesdì puderà duc i nteressei nce audì n referat sun la funzion dla valutazions di sculeies.

Jì cun i schi y l snowboard ie n devertimënt sce la jënt sun i purtoies se astila nce aldò. Acioche i jëuni se debe ju cun l drë cumpurtamënt ti raions da mont ntan l inviern, iel da pert dl’Euregio unì fat l film “Ski – Fun & Safe”. Chësta produzion unirà prejenteda ai 4 de setëmber tl filmclub a Bulsan deberieda cun l presidënt dla Grupa europea de culaburazion teritoriela (GECT/EVTZ) Luis Durnwalder y dal’ex atleta dl schi Karen Putzer.

La Cunsulta provinziela ladina per i jëuni ie unida ngrandida. La Jonta provinziela de Bulsan à (NCUEI) ai 26 de agost, te si prima senteda do la paussa da instà numinà Jaime Venturini de Urtijëi.

I spediei dl Sudtirol dëssa pudëi se giamië i dac che reverda la Sanità. La Jonta provinziela à (NCUEI) ai 26 de agost nciarià la sozietà Südtirioler Informatik AG de svilupé n sistem de nfurmazion per chësc bujën. Tla senteda plu curta dl solit, iel nce unì tëut la dezijion de ngrandì l zënter vijitadëures dl Geoparc Bletterbach y de seguré la funzion de cëses per studënc.

Do na pausa da instà de trëi enes, va n lunesc 26 de agost inò inant la sentedes dla Jonta provinziela da uni ena. Davia che l presidënt dla Provinzia y i assessëures furnea mo l medemo di tl Tirol dl Nord per vijité l cunzern Swarovski, toma demez la cunferënza stampa riesc do la senteda de Jonta.