Atualità

L Strom y la segurëza publica ie stai i doi argumënc prinzipei che à caraterisà la senteda dla Jonta provinziela dl 17 de juni. L presidënt dla SEL à prejentà la situazion atuela, cun drët de bon resultac. La Jonta à pona fat ora de scëmplifiché la pruzedures per sëurandé cunzescions a zëntreles nchin a 1000 chilowatt. Danter i ponc de majer nteres prejentei dal presidënt dla Provinzia Luis Durnwalder iel nce pruvedimënc per ti ji permez ai truep caji de ciavatedes y viulënza ntan la nuet.

De plu caji de ciavatedes ntan la nuet à purtà pro che la Jonta provinziela ebe tratà la cuestion dla segurëza publica tl Sudtirol. Aldò dl presidënt ne dëssa la situazion nia unì dramatiseda, purempò iela da tò sul scerio. I assessëures provinziei se damanda pruvedimënc coordinei da duta la pertes tuchedes.

La cunzescions dal’ega per fé strom nchin a un n megawatt dëssa unì dates ora cun na pruzedura plu scëmpla. La pruposta de lege aldò ie (NCUEI) ai 17 de juni unida data pro dala Jonta provinziela.

N valor de 1,5 miliardes de euro, 430 culaburadëures y i priejes dal strom plu basc: chëstes ie la zifres plu mpurtantes che la sozietà dal strom SEL à prejentà (NCUEI) ai 17 de juni te Jonta provinziela. Tl stritoz per la cunzescions, uel la Jonta provinziela ruvé a una cun l’autra sozieteies dal strom per nia messei scrì ora la cunzescions da nuef y resië che les ruva tla mans de sozieteies da oradecà.

La streda danter Plan y Plan de Gralba ie ntan chëst’ansciuda zeduta plu di ani passei. N toch de feter vint metri ne tën nia plu y à n pert messù unì sarà ai auti. Te n sëuraluech à l assessëur ala stredes Florian Mussner sorissà l bujën de n ntervënt de prëscia per garantì la viabltà sun la streda di jëufs.

(NCUEI) Ai 14 de juni ne à la scolines ladines nia me stlut ju l ann de scola, ma nce n majer proiet plurilinguistich. A San Martin de Tor iel unì prejentà uniteies didatiches per ti nsenië ai pitli dla scolina trëi rujenedes. A chësta maniera fej la scolines ladines n var de cualità cun metodologies inuvatives.

Te chëla che la dezijion sun i candidac per deventé capitela culturela 2019 ruva n var al iede for plu daujin, à l assessëur Tommasini (N SËIRA) ai 13 de juni giaurì la mostra "Step by Step 2019" tl Museion a Bulsan. Te chësta ucajion iel nce stat n barat cun la concurëza da Ravenna y Matera.

Canche n sada y dumënia, 15 y16 de juni, se ancunterà jëuni dla cin valedes tl prim festival inerladin la junëza, uniral fat n var de gran valor per la union ladina. “I ladins dla cin valedes ie ujins che se anconta puech danter ëi, i jëuni ie stai boni de pité n festival dl’ancunteda y chësc dà crëta per l daunì” sorissea l assessëur ai jëuni ladins Florian Mussner.

Deberieda cun i tecnics dla Provinzia, l ambolt de Sëlva y i respunsabli dal furnadoia Dantercëpies se à l assessëur provinziel Pichler Rolle fat n cheder dla situazion sun Dantercëpies ulache l fova unì ju na majera smueia. Nchin ala sajon da inviern dëssa purtoi y furnadoia vester anjeniei. Mo n sëuraluech per abiné la miëur soluzion.

L presidënt dla Provinzia Luis Durnwalder à (NCUEI) ai 12 de juni pià do la gran uneranza d’or dl Land Wien. Chësta uneranza “cun stëila” ti ie unida sëurandata dal presidënt dl Land Wien Michael Häupl a Viena.