Atualità
-
L’assessur provinzial Mussner sön la banda leria: i mesi é dan man, coliamënt ćina la fin dl 2013
L’assessur provinzial Florian Mussner ti respogn ales ćiacoles che la Provinzia n’ess nia assà mesi por colié düć i comuns ala rëi de fires otiches ćina la fin dl 2013. "Le plan vel inant, i mesi che va debojëgn é bele dan man", spliga Mussner.
-
Stieres tla scolines ladines vën sëurandates ai 18 de juni
N merdi ai 18 de juni uniral sëurandat de ndut 27 stieres tla scolines ladines per l proscimo ann de scola. Maestres che ie tla graduatories per trasferimënc y per ncëries a tëmp determinà ie nviedes tla direzion dla scolines a Piculin.
-
15 de juni prim di d’ejams dla mesana, ai 19 de matura
Tla scoles ladines iel chëst ann 290 candidac per l ejam de scola mesana y 63 per la matura (ejam de stat). N sada ai 15 de juni uniral tla cin scoles mesanes dla valedes ladines tenì l prim di de ejam, tla trëi scoles autes ladines scumëncia i ejams de matura ai 19 de juni.
-
Dala senteda dla Jonta provinziela dl 10 de juni
L’agenzia nueva per tò ite chëutes, tarifes y straufonghes per cont dl’aministrazions locales, aiuc de doi milion de euro per l Tirol y Bayern tuchei dala gran eghes y de plu vares acioche l mplant dal refudam nuef a Bulsan posse scumencé l’atività de prova ie stata la dezijions de majera mpurtanza che la Jonta provinziela à tëut te si senteda ai 10 de juni.
-
Jonta provinziela à metù su l servisc per tò ite chëutes
La Provinzia y i chemuns arà nstes n’agenzia che se cruzia de tò ite chëutes y straufonghes. L at de fundazion cun statut ie (INIER) ai 10 de juni unì azetà dala Jonta provinziela metan su n pot de referimënt per i zitadins canche la se trata de chëutes y tarifes.
-
Gran eghes tl Tirol y Bayern: Provinzia juda cun doi milion
Doi milion de euro à la Jonta provinziela (INIER) ai 10 de juni metù a desposizion per judé a curì l dann che la gran eghes à fat tl Tirol y te Bayern. La soma ie penseda sciche sëni de solidarietà da pert dla populazion dl Sudtirol de viers dla vitimes dla catastrofa naturela, spiega l presidënt dla Provinzia Durnwalder.
-
Mplant dal refudam scumëncia la proves ala fin de juni
Ala fin de juni scumëncia l mplant dal refudam a Bulsan Sud si atività. Ntan i prim sies mënsc uniral tenì na fasa de prova, per chëla che la cumuniteies de raion menerà adalerch si refudam. L’acurdanza aldò - danter la Provinzia, la cumuniteies de raion y l gestëur ECO Center AG - ie (INIER) ai 10 juni unì azeteda dala Jonta provinziela.
-
Provinzia – Chemuns: argumënc tratei deberideda
La Jonta provinziela y l cunsëi dl chemuns dl Sudtirol à (NCUEI) ai 10 de juni tenì na senteda deberieda tl palaz Widmann a Bulsan, per traté argumënc che reverda l’aministrazion provinziela te tramedoi ciamps de cumpetënza. Dessot i argumënc plu mpurtanc prejentei dal presidënt dla Provinzia Luis Durnwalder y dal presidënt di chemuns Arno Kompatscher tla cunferënza stampa deberieda.
-
Raions periculëusc: se tenì al’esperienza
Aldò de normatives euorpees y stateles muessa i chemuns lauré ora plans di raions periculëusc. Tla senteda deberieda de Jonta provinziela y Cunsorz di chemuns iel unì cunsià de se tenì nce al’esperienza di ultimi doi o trëi seculi, dan pruibì defin ntervënc ala cëses.
-
Provinzia y chemuns: prugramazion dl’antënes per i fonins
L’antënes per i fonins ne uel deguni avëi daujin a cësa, ma duc les adrova. Tla senteda deberieda dla Jonta provinziela y dl Cunsorz di chemuns iesen ruvei a una che l dëssa unì laurà ora plans che vëij dant ulache l ne possa nia unì metù antënes y ulache l unirà fat su stendri. Nsci vëniel arjont na bona efiziënza stravardan la populazion da radiazions massa stersces.