Atualità

USP - I archifs nüs tl Museum Ladin Ćiastel de Tor a San Martin de Tor vëgn surandà ofizialmënter dal Presidënt dla Provinzia Luis Durnwalder y dal assessur provinzial Florian Mussner ai 31 de mà.

Sëuraprò ala previjions meteo per dut l Sudtirol vëniel śën nce pità l tëmp da mont tla rujeneda ladina. Sun pruposta dl assessëur ladin Mussner se à i metereologhes y la tradutëures dla Provinzia, (N SËIRA) ai 21 di de mei, tëut dant de slargë ora l servisc meteo dla Provinzia de Bulsan a dut l raion dla cin valedes ladines dolomitiches.

Acioche al pois gnì fat la entrada tla Val Badia val debojëgn da spostè i rôs dal gas. Sön proposta dl assessur Florian Mussner à la Junta provinziala aprovè (incö) ai 21 de mà da finanzié le spostamënt di rôs por 2,8 miliuns de euro.

Do che l vën bele n pez laurà te na pruposta de lege “sparani per n cuatier”, giatela for plu forma. (NCUEI) Ai 21 de mei à la Jonta provinziela tëut na dezijion de mascima per mudé la lege de sustëni a frabiché l cuatier. Te chësta mudazion dëssel unì metù a jì pruvedimënc atratives per ressané vedla cëses ti zëntri di luesc.

Danter Longega y Al Plan vëgnel metü man chisc dis i laûrs por arjigné i rôs dl internet aslöm. Cun chisc laûrs scomëncia na linia de intervënć da pert dla Provinzia de Balsan por portè i coliamënć de fira otica tla Val Badia. L’internet aslöm assigurëia le dagnì economich y sozial ti paîsc da munt, sciöche i nüsc” sotrissëia l’assessur provinzial Florian Mussner.

L problem di destubs tl mparé y mëter a verda se lascia for plu sentì nce tla scoles ladines. Per ti jì ancontra a chësc problem di sculeies à l Servisc de cunsulënza y ntegrazion tenì na spezialisazion de trëi ani. N vënderdi 24 de mei uniral a Sarns sëurandat diploms a 25 nsenianc dla scoles ladines.

Na cunvenzion inuvativa che mët n drova l federalism nce tl ciamp dla radiotelevijion y che gëura la streda ala Val d’Aosta y al Friul: nsci iel (NCUEI) ai 16 de mei unì prejentà a Roma la cunvenzion nueva Stat-RAI-Provinzia de Bulsan per la trasmiscions televijives y radio tla rujeneda tudëscia y ladina. Chësc var storich, dantaprima per la mendranza ladina, ie unì prejentà dal sotsecreter dla Presidënza dl Cunsëi di Ministri Giovanni Legnini, dal presidënt dla Provinzia Luis Durnwalder, dal assessëur Florian Mussner y dal diretëur generel dal RAI Luigi Gubitosi.

La costruziun de biblioteches al dedaincö, les "Ćiases dl savëi” é l’argomënt de na sëra de referać cun discusciun tla biblioteca provinziala Teßmann a Balsan. La sëra ai 30 de mà fej pert dla linia de referać dal titul “Texturen”.

Per via dla festa de Pasca de Mei ne tën la Jonta provinziela si senteda nia n lunesc che vën, ma perchël n merdi ai 21 de mei. Riesc do, dala 12.30 tën l presidënt dla Provinzia na cunferënza stampa.

Per doi rejons furnea l presidënt dla Provinzia Luis Durnwalder duman, juebia, 16 de mei a Roma. Cun i respunsabli dla ferata se tratela de udëi tan inant che i ie cun la proietazion per l raion dla stazion dla ferata a Bulsan. Deberieda cun l assessëur ladin Florian Mussner vëniel prejentà co che unirà metù n drova la cunvenzion nueva per la RAI tudëscia y ladina a Bulsan.