Atualità
-
Tradizions y autere de Gherdëina n Lunesc de Pasca tl Museum Ladin
USP - N lunesc de Pasca uniral tl Museum Ladin a San Martin prejentà i resultac dl proiet europeich ECHI. Dala trëi domesdì puderan danterauter udëi na postazion multimediela cun film sun la tradizions de Gherdëina cun prejentazion y benedescion de n autere dl 1899.
-
Plü lerch ales Dolomites tla Ćiasa dl Parch Natural a Al Plan
USP – Le comun de Mareo é te döt le Südtirol le comun cun la majera spersa reconesciüda sciöche patrimone mondial UNESCO. Tla Ćiasa dl Parch Natural a Al Plan déssel inće gnì presentè le patrimone mondial aladô. Pro na vijita a Al Plan ti à l’assessur Elmar Pichler Rolle lascè alsavëi al ombolt Albert Palfrader che la proietaziun por ingrandì la Ćiasa dl Parch Natural é bele a bun punt y che la Provinzia fajarà ćiamò en chësc ann na majera plaza dai auti por la Ćiasa dl Parch Natural.
-
Dala senteda dla Jonta provinziela dl 25 de merz
La coordinazion dl mantenimënt dla rë de internet aslune, i prudoc bio, cuntribuc per chiche ne possa nia maië spëisa da gluteina, l recunescimënt de n ridl model per l sparani energetich y la cunzescions da fé strom ie stai i argumënc prinzipei tratei dala Jonta provinziela ai 25 de merz y prejentei te cunferënza stampa dal presidënt Luis Durnwalder.
-
Jonta provinziela ncëria la SIAG de coordiné la rë de comunicazion
USP – Anjenië na rë de culegamënc internet aslune ie me una pert, la va nce de mantenì chësta rë. Sun pruposta dl assessëur Mussner à la Jonta provinziela dant pro de njenè na zentrela de coordinazion per l mantenimënt y funziunamënt dla rë. La ncëira ie unida data ala sozietà de nfurmatica SIAG.
-
Prudoc bio, spëisa zënza gluteina y model de sparani energetich
USP – Per pité garanzies di prudoc bio à la Jonta provinziela dat pro normes nueves. Ala persones che ne possa nia maië spëisa cun gluteina vëniel dat n sustëni finanziel. Da pert dla Union Europea iel unì recunesciù n proiet de sparani che dëssa vester de ejëmpl.
-
Caia te Jonta provinziela: doi pusciblteies per la cunzescions da fé strom
USP – La Jonta provinziela y l Cunsorz di Chemuns ova nciarià l prufessëur Giuseppe Caia de na mediazion tl stritoz per la cunzescions dal’ega per fé strom y de lauré ora prupostes. (NCUEI) Ai 25 de merz à l prufessëur tëut pert ala senteda dla Jonta provinziela per scuté su la minonghes di assessëures provinziei. Per l’ena do Pasca se aspieten na si tëuta de posizion.
-
27 nsenianc anjeniei per la graduatories ladines
USP - Per pudëi nsenië tla scoles ladines muessen avëi fat n ejam de ladin per nsenianc. Di 30 candidac che se à l’ena passeda prejentà al ejam de ladin a Urtijëi ie passei l 90 percënt. Ëi possa sën fé dumanda de ruvé tla graduatories di nsenianc dla scoles y scolines ladines.
-
Surandada di laûrs dla strada da Rina
USP - La firma de costruziun Oberosler Cav. Pietro AG é gnüda inćiariada dala Provinzia da fà i laûrs de ampliamënt dla strada provinziala da Rina. La firma da San Laurënz à ciafè l’inćiaria tres na gara d’apalt. La surandada é gnüda fata (INCÖ) ai 22 de merz tl’Agenzia di apalć.
-
Cunsulënza per lies de ulentariat
USP – Ala lies che lëura tl ulentariat ti pieta la Provinzia cunsulënzes sun cuestions de chëutes. Chësc servisc dl Ufize provinziel per cuestions de cabinet vën pità (NCUEI) ai 22 de merz y pona mo trëi iedesc nchin de juni.
-
Gran nteres al sustëni speziel per lifc dai schi
USP – La rë de servijes tl luech ne reverda nia me l cumerz. Aldò dl assessëur Widmann iel de mpurtanza che i luesc ebe nce nfrastrutures turistiches atratives. Per chësta rejon iel unì nvià via n sustëni speziel per i lifc dai schi ti luesc. Nchiamò iel ruvà ite 15 dumandes.