Atualità

USP – L ajurnamënt di nsenianc y anjenië materiai didatics, deberieda cun la nrescida y l’evaluazion ie i proiec prinzipei che la Ntendënza ladina cun si servijes pedagogics y l ciamp de lëur Inovazion y cunsulënza se à tëut dant per l ann 2013. Dut l program de lëur tol ite la scolines y la scoles di luesc ladins.

USP – Tla Cunsulta ladina di sculeies ti vëniel ai reprejentanc di sculeies dat la puscibltà de purté ite prupostes per miuré l servisc dla scoles y ntëur la scoles ti luesc ladins. Tla prima senteda dla cumposizion nueva ie Romeo Costa unì lità presidënt.

USP – La Comisciun provinziala por la contrada à azetè te süa sentada da chëst’edema le proiet menè ite dal Comun de Badia por slarié la strada cuntra Oies y fà n marciapîsc por garantì plü segurëza a chi che va a pé.

USP – Ngrandì la lerch de muvimënt ai zitadins, ala firmes y al’aministrazions publiches ie l fin primer che la Jonta provinziela se à tëut dant tla pruposta de bilanz 2013. Chësc dëssa unì arjont tulan demez pëis dla chëutes, cun pruvedimënc de sparani y na reduzion de burocrazia. L presidënt dla Provinzia Luis Durnwalder à detlarà chësc (NCUEI) ai 6 de dezëmber te si relazion de bilanz, fajan nce autocritica.

USP – La Cumiscion tecnica dla Provinzia à azetà l proiet per na scola mesana nueva te Sëlva y l ngrandimënt cun renuvamënt dla sarenera a Puntives. Cun chësc dé pro di proiec de mascima, possel unì laurà inant per fé i proiec esecutives.

USP – Aministrazion publica, nutizies, servijes y banches dac te na forma inuvativa y zënza papier: La Rë zivica dla Provinzia de Bulsan à ti ultimi ani arjont na gran popularità. (NCUEI) ai 5 de dezëmber à l assessëur Florian Mussner metù online la verscion per ladin. Deberieda cun nfurmazion d’uni sort vëniel per l prim iede nce pità la previjions dl tëmp tla rujeneda ladina.

USP – Pro le conzert d’Advënt di grups ladins tl Dom de Balsan darà l’ensemble Pinzimonio Vocale dla Val Badia n contribut particolar. Deboriada cun ćiamò cin d’atri grups ćiantarài ai 14 de dezëmber por ti presentè al publich de Balsan la particolarité culturala ladina da ćiantè l’Advënt. Cun chësc conzert gnaràl inće pité na ocajiun de incuntada danter les cultures.

USP - Cun la prima senteda à la Sezion ladina dl Cunsëi scolastich provinziel chisc dis metù man si atività. Tla senteda costituënta ie unì lità doi cumiscions: l cunsëi dl personal nseniant y l cunsëi dl personal diretif y ispetif.

La culaburazion y l barat danter sindacac, mprenditëures y i assessëures provinziei à abù l majer pëis tla senteda dla Jonta provinziela ai 03 de dezëmber. Danter i argumënc prinzipei, prejentei te cunferënza stampa dal presidënt Luis Durnwalder iel nce stat l sustëni dl’espurtazion, l mëter a jì di joi a Roma y la segurëza sun la stredes dala lueses.

USP - Per garantì plu segurëza sun la stredes dala lueses à la Jonta provinziela (NCUEI) ai 03 de dezëmber nciairà l assessëur Berger de lauré ora ndicazions nueves.