Atualità

USP – La Jonta provinziela de Bulsan ie (NCUEI) ai 22 de utober stata a una de ti judé a Cortina a mëter inò a jì l sistem de liber fundier, ma danora muessel mo unì stlarì vel particuler giuridich.

USP – Per ti pité l miëur tratamënt a pazienc cun tumor, vëniel metù a jì zëntri de cumpetënza. Per chësta rejon à la Jonta provinziela (NCUEI) ai 22 de utober dat pro l sistem nuef per zertifiché la repartizions di spediei dajan pëis ala majera esperienza di dutores y dla repartizions.

USP – Aldò dl regulamënc possa jëuni permò fé vel lëur d’instà canche i à cumplì i 15 ani. La Jonta provinziela à (NCUEI) ai 22 de utober dat pro n program de mascima che vëija dant ativiteies nce per plu de jëuni a cundizion che l ispetorat dl lëur y i genitores sibe a una.

USP – La cunzescions dal’ega per fé strom ne dëssa nia plu unides dates ora dala Jonta provinziela, ma a chiche pieta de plu. Danora muessa la dumandes passé n ejam dl dann ambientel y pona messeral unì paià na pert per ntervënc ambientei. Chësc prinzip à (NCUEI) ai 22 de utober dat pro la Jonta provinziela cun duc i assessëures a una.

USP - „Sce l ne suzed nia mo velch, pona uniral tenì ite program ti lëures per la linia dl Prëner, ajache duc i partner tën da si mpënies de finanziamënt.” Chësta ie la contlujion dl presidënt dla Provinzia Durnwalder, (NCUEI) ai 19 de utober, do la senteda dl Cumité interstatel per l tunel dl Prëner y l miuré dla linia dl Prëner, stata a Bulsan.

USP – Cin argumënc se à l presidënt dla provinzia Durnwalder deberieda cun i assessëures Widmann y Bizzo tëut dant per l’ancunteda cun l minister Corrado Passera, (INIER) ai 18 de utober a Bulsan. La se tratova de respeté la regules dl’Autonomia, dl scrì ora di joi danter Bulsan y Roma, l daunì dla firma de silizium MEMC, l recurs al regulamënt provinziel per l cumerz y finanziamënc per la RAI de Bulsan.

USP – Tla Talia àra doré dî, porchël é la sodesfaziun por la sconanza dles Alpes ćiamò maiù: Le Parlamënt à ratifiché l’ultim protocol dla Convenziun dles Alpes che manćiâ ćiamò, chël dl trasport. “La ratificaziun é tardia de agn, mo al é finalmënter n vare concret por na majera sconanza dles Alpes che n Stat po fà” se inconforta l’assessur por l’ambiënt Florian Mussner.

USP – Sparanië 70 milion de euro y ne n tò ite 50 de manco: nuviteies da Roma fej feter for referimënt al bilanz provinziel y a chësta maniera à la Jonta provinziela (NCUEI) ai 15 de utober per na segura metù 120 milion de euro sun na pert per vester anjeniei ala pertendudes nueves da Roma.

USP - La Cunsulta provinziela per la Cultura ladina à te si senteda da d’autonn, (INIER) ai 11 de utober tratà la dumandes per n sustëni finanziel a nvestizions. Duta la diesc dumandes che reverda chësta sort de cuntribuc tl ciamp dla Cultura ladina ie unides azetedes.

USP – Do che l’analises dl lëur de scola y dla cumpetënzes arjontes dai sculeies ie i ultimi ot ani unides coordinedes da n cumité per l’evaluazion, vën l lëur de evaluazion da chësc ann de scola curà da na culaburadëura dla Ntendënza. Pra l rendicont dl Cumité de evaluazion tla scola ladines dal 2004 al 2012, (NCUEI) ai 11 de utober a Bulsan, iel unì mustrà su la mpurtanza di mpulsc dl’evaluazion per svilupé inant l sistem scolastich ladin. Te chësc mumënt iesen tl lëur da analisé la cumpetënzes di sculeies ladins tla rujeneda nglëija.