Atualità

USP - Te cuestions de cuatieres soziei à la Jonta provinziela (NCUEI) ai 17 de setëmber tëut trëi dezijions. L unirà cumprà 164 cuatieres te 16 chemuns (nce a Urtijëi), l vën scemplificà la pruzedures per ressané cuatieres soziei y a Maran vëniel cumprà 50 cuatieres per la categuria de davani mesan.

USP – La Jonta provinziela à tratà la furmazion y l mené de register per i cumpaniadëures su per mont y cumpaniadëures de grupes turistiches. La figura dl cumpaniadëur su per mont ne ie (NCUEI) ai 17 de setëmber nia unida azeteda.

USP – La Cumuniteies raioneles dëssa purté dant prupostes de inuemes de mëndri raions y pona saral na cumiscion paritetica a tò la dezijion. L presidënt dla Provinzia à (NCUEI) ai 17 de setëmber riesc do la senteda dla Jonta provinziela stlarì chësc pont zentrel dla lege data pro tla nuet danter n vënderdi y sada. L unirà fat n’ancunteda cun la cumuniteies raioneles.

USP – Do che l ie unì metù adum la repartizions provinzieles per la cuntreda y l’urbanistica, à la Jonta provinziela (NCUEI) ai 17 de setëmber dat pro na reduzion y cumposizion nueva dla Cumiscion per la scunanza dla cuntreda.

USP – Tl Ciastel Tirol iel (NCUEI) ai 16 de setëmber unì sëurandat uneranzes dl Lond Tirol a 42 persunaliteies. 13 crëujes de merit à giapà tei dl Südtirol, danter chisc nce trëi di luesc ladins. L mpëni che la persunaliteies à abù per la cumenanza ne ie nia velch da uni un, perchël ti vëniel iust te chisc tëmps dat mpurtanza cun la uneranzes.

USP – L Guviern a Roma à azetà la lege provinziela dl’ena a cin dis per la scoles dl Südtirol y l minister al’istruzion Profumo à dat pro l decret per tenì i cursc de abilitazion per maestri tl’Università a Persenon. L assessëura Kasslatter Mur che à giapà la nutizies da Roma, valuteia chëstes sciche gran suzes.

USP – Do 40 ani de Autonomia nueva dla Provinzia de Bulsan se tratela de abiné soluzions a descriminazions sciche chëla che n ladin ne possa nia deventé vizepresidënt dla Provinzia. Pra l Di dla Cultura Ladina, (NCUEI) ai 14 de setëmber a Bulsan iel unì pità nfurmazion plu sota dl’Autonomia dl Südtirol dal pont de ududa ladin. Permez ai ladins de Trënt y de Belun se n sta chëi dl Südtirol miec y de chësc dëssa i zitadins nce tenì cont.

L 2012 ie l ann di anuei dl’Autonomia: dan 40 ani ie jit n drova l Statut de Autonomia nuef y dan 20 ani à l’Austria y la Talia sotscrì la fin dl stritoz per l Südtirol. La Provinzia de Bulsan pieta de plu ucajions per cunëscer miec l svilup che nosc raion à abù te chësc tëmp, la pusciblteies che pieta l’Autonomia y si mpurtanza per la cualità de vita. I anuei di 40 y di 20 ani vën leucuredei cun la merca 72:92:12.

USP – La crëujes de merit dl Lond Tirol vën chëst ann inò sëurandates tl Ciastel Tirol. I doi presidënc de provinzia Luis Durnwalder y Günther Platter fajerà n dumënia ai 16 de setëmber nce la uneranzes a 13 persunaliteies dl Südtirol.

USP – N juebia ai 13 de setëmber vëniel te cësa de Chemun a Santa Crestina mustrà n film y tenì na descuscion per ti jì do ala dumanda sce l permafrost fej sauté la pizes. La sëira a ntreda debant se stiza sun analises che ie nce unides fates sun Mëisules.