Atualità

USP – Aldò dla lege statela “Spending Review” muessa nce la Provinzia smëndrì i custimënc per pudëi ciafië tl 2013 cun n mënder bilanz. La Jonta provinziela à (NCUEI) ai 03 de setëmber scumencià a prugramé cuncretamënter la reduzion de custimënc per i assessëures, l mëter adum ufizies y l tò su personal. A chësta maniera unissel sparanià da 25 a 30 milion de euro.

USP – Cun l ann de scola nuef, che scumëncia n mierculdi 5 de setëmber, vel i orars de scola nueves. Te duta la scoles di luesc ladins sarà per l prim iede dlonch la sada liedia. Tl’elementeres, mesanes y autes ladines vëniel dlonch tenì l merdi y la juebia domesdì scola. Sëula ezezion fej la scoles mesanes de Al Plan y de San Martin.

USP – Al é gnü fat n vare important por le coliamënt dl internet aslöm por Mareo (INIER) ai 30 d’agost. La Provinzia à surandè i laûrs por fà i ros de coliamënt danter Longega y Al Plan.

USP – N merdi ai 4 de setëmber uniral tla chëurt dl palaz provinziel 2, la sënta dl Assessorat provinziel ladin, descurì la scultura de Gherdëina “Im Dialog”. Chësc unirà fat dal vëscul Ivo Muser, l presidënt dla provinzia Luis Durnwalder y dal assessëur ladin Florian Mussner.

USP - L’aministrazion dla scoles de mujiga ti luesc ladins unirà nce tl daunì meneda deberieda cun la scoles de mujiga tudësces. La Jonta provinziela à tenì cont dla situazion particulera dla mendranza ladina y à azetà de nia destaché l’aministrazion dla scoles de mujiga ti luesc ladins. “A chësta maniera à nsenianc y sculeies de plu pusciblteies” spiega l assessëur ladin Florian Mussner.

USP – Per furné la streda dl Stelvio/Stilfs, una dla stredes plu spetaculeres dl’Elpes, saral n auter ann da paië n daz. Duta la nfurmazion sun l “Greenpass” ie da giate tres internet sun la plata web nueva dl deparitmënt provinziel per i lëures publics dal adres www.greenpass.bz.it.

USP - La biblioteca provinziala “Friedrich Teßmann” inviëia adöm cun le Südtiroler Künstlerbund ala letöra dl autur. Joseph Zoderer lî ai 13 de setëmber fora de so liber: „Mein Bruder schiebt sein Ende auf“.

USP - L “mond dla Scola Ladina” se ancunterà chëst ann ai 04 de setëmber per dl Di dla Scola Ladina y per scumencé l ann de scola cun n danmesdì de ajurnamënt. Pra chësc di a Al Plan de Mareo rujenerà l presidënt dla Provinzia, l assessëur provinziel ladin y l ntendënt ladin. Dopro saral da audì n referat sun la problematica dla tlasses che ne à nia tla man.

Hotiei possa inò damandé sustëni per nvestizions, la Provinzia mprësta scioldi per pudëi paië ora firmes y zitadins, n cudejel per spieghé l’Autonomia ai fulestieres, cunzescions dal’ega per fé strom y la prupostes de lege che la Jonta uel mo purté inant chësc ann: chisc ie stai i argumënc zentrei dla senteda dla Jonta provinziela ai 27 de agost, che l presidënt dla Provinzia Luis Durnwalder à prejentà te cunferënza stampa riesc do la senteda.

USP – Ciuldì ie pa la tofles di luesc da nëus te trëi rujenedes? Ciuldì vëniel pa tl Südtirol sentà tan de lëns da mëiles? Co se mantën pa na tel pitla provinzia da mont? A chësta dumandes che feter sies milion de turisc’ se fej for inò canche i vën tl Südtirol, respuend n cudejel nuef. La Jonta provinziela à (NCUEI) ai 27 de agost dat pro de stampé chësc cudejel che dëssa spieghé nosta Provinizia ai fulestieres y ti dé nfurmazion.