Atualità

USP – Cumedures ai purtoies dai schi sun Secëda y Dantercëpies, n culegamënt per fé nëif sun Piz Sorega, sëura S.Ciascian, y l mëter ju material a Corvara ie (INIER) ai 24 de lugio unic azetei dala Segonda cumiscion provinziela per la scunanza dla cuntreda.

USP – N var al iede vën la reforma dla scoles autes nce metuda n pratica per l nseniamënt de mestieres tla scoles prufesciuneles. Da mez lugio vel l regulamënt nuef y dal’ultimo lunesc nce i tëmps de nseniamënt per 108 mestieres. L assessëura Sabina Kasslatter Mur à (NCUEI) ai 25 de lugio prejentà la nuviteies per lerneri y patrons de lëur.

L pachetl per l crëscer economich che unirà chisc dis tratà tl Parlamënt a Roma vëija dant che l Stat se tole la cumpetënza de scrì ora la cunzescions dal’ega per fé strom. Per la Jonta provinziela ie chësc n pericul che l ti vënie tëut na cumpetënza dl strom. Aldò dl barat cun l Stat giapà la Provinzia la prima pert dla puscions dla ferata per avëi fat de plu lëures pra la stazions. Tl Südtirol muessa i paures paië la chëuta IMU, la Jonta provinziela à sën fat ora ulà che l dëssa unì fat ezezions. - Chisc ie stai i argumënc zentrei dla senteda dla Jonta provinziela ai 23 de lugio che l presidënt Luis Durnwalder à cunedì te cunferënza stampa riesc do la senteda.

USP – La Provinzia de Bulsan à tres ndicazions ai chemuns udù dant che nce i paures dëssa paië si pert dla chëuta IMU. La Jonta provinziela à (NCUEI) ai 23 de lugio dat pro i caji cuncrec, tl cuntest dl’agricultura, ulache l pudëssa unì fat delibrazions dal IMU.

USP – La Provinzia de Bulsan ova fat n’acurdanza cun l Stat che la ëssa pudù sëurantò puscions dla ferata te chëla che la ëssa fat lëures pra la strutures. Do che la prima pert di lëures, majera pert te Puster, ie stluta ju, à la Jonta provinziela (NCUEI) ai 23 de lugio azetà ufizialmënter de sëurantò la prima pert dla puscions dla ferata.

USP – Aldò dl test provisor per na lege statela nueva ne puderà la Provinzia nia plu nstëssa mëter su criteries per dé ora la cunzescions dal’ega per fé strom. L Presidënt dla Provinzia Durnwalder à (NCUEI) ai 23 de lugio riesc mandà n telegram al minister de cumpetënza per se damandé stlarimënc.

USP - Danter la linga de cursc da instà per l’educadësses dla scolina y nsenianc de scola, iel n vënderdi ai 19 unì finà via n curs particuler a Calfosch. Deberieda cun doi reatëures se à 18 educadësses dla scolina dat ju cun stories che conta dla vita per ti jì plu sot al argumënt dla furmazion di pitli.

USP – Cun la mostra de Gabriele Grones gnaràl en vëndres, ai 27 de messè 2012 dales sis da sëra, daurì la secunda mostra da d’isté tl Istitut Ladin a San Martin de Tor. Deboriada cun la lia Ert por i Ladins él gnü metü a jì na ligna de indöt cater mostres de artisć ladins che sarà do y do da odëi tratan döt l’isté.

USP - N lunesc à la Jonta provinziela nvià via l valivé dla cundizions per strutures che cëla de fantulins, (NCUEI) ai 19 de lugio à l assessëur Theiner fat l proscimo var per la lege dla families, la tratan cun la grupa de esperc dan che la pruposta de lege vënie pona do la pausa da instà data pro dala Jonta provinziela.

USP – En lönesc, ai 23 de messè 2012 scomëncia a La Val le proiet “Scolina da d’isté” por chël che la Direziun dles scolines ladines mët a desposizion maestres de scolina. La Provinzia y le Comun colaborëia por ti jì incuntra a n bojëgn dles families che é tres plü sintì inće ti paîsc ladins.