Atualità

USP – Daujin ala cava sun jëuf de Sela fej l Assessorat ai lëures publics n segondo puent da nuef. (INIER) Ai 17 de lugio iel unì sëurandà i lëures.

USP – La reforma dl marcià dl lëur à purtà plu flessibilità y sgors, plu scunanza per i lauranc precaries y nce plu burocrazia per l’aministrazion. I respunsabli dla Provinzia per l marcià dl lëur à (NCUEI) a 18 de lugio, l di che la reforma ie jita n droa, prejentà la pertes zentreles dla reforma sorissan che l muessa mo unì stlarì truep particuleres a livel talian.

USP – Na revijion dla norma per smendrì l custimënt dla sanità tla regions che se la finanzieia nstësses, recunëscer l’Acurdanza de Milan y na tlausula de scunanza: chisc ie i trëi ponc che i presidënc dla provinzies autonomes de Bulsan y Trënt deberieda cun i presidënc dla Val d’Aosta y dl Friuli Venezia Giulia à fat ora (NCUEI DOMESDI) ai 16 de lugio a Borghetto all’Adige.

Tla Furtëza de Franzensfeste iel ntan l instà da udëi na gran mostra che pieta na sëuravijion dl’ert atuela tl Südtirol. “Panorama 4” ie na scumenciadiva dla repartizions provinzieles ala cultura dla trëi grupes de rujeneda che à nce dedicà lerch a artisc’ ladins.

L crì n’aleanza cun l’autra regions autonomes per se paré dala mpustazions dl Stat sun la cumpetënzes autonomes tl cheder di pruvedimënc de sparani ie stat l argumënt zentrel dla senteda dl 16 de lugio (Domesdì saral n’ancunteda dla regions autonomes dl nord). Sëuraprò à la Jonta provinziela tratà la prima pert dla lege sun la familia, la gestion dl furnel dal refudam a Bulsan y la soluzion per l material che vën giavà ora dl tunel dl Prëner. L presidënt Luis Durnwalder à cunedì la dezijions prinzipeles tla cunferënza stampa riesc do la senteda.

USP – Majera pert dl material che vën giavà ora a fé l tunel dl Prëner vën nuzà. Per chëla pert che ne possa nia unì nuzeda à la Jonta provinziela (NCUEI) ai 16 de lugio dat pro na soluzion. Te chësta senteda iel nce unì dat pro i reprejentanc dla cumiscion scientifica.

USP – L furnel dal refudam nuef a Bulsan ie la resposta dla Jonta provinziela a un di majeri bujëns di chemuns: chël de tò y jì l refudam. I lëures ie bele a n bon pont y n auter ann dëssel bele jì n funzion, ma sën ne iel nia plu tler chi che dëssa sëurantò chësc mplant. La Jonta provinziela à (NCUEI) ai 16 de lugio fat ora de lascé lauré ora na pruposta.

USP – La Jonta provinziela à dat pro la prima pert dla pruposta de lege per la families. La pert data pro (NCUEI) ai 16 de lugio reverda l’assistënza di fantulins te chëla che l ie dantaprima debujën de na unificazion dl finanziamënt.

USP - Dan che la Provinzia compra opres d’ert, iel de bujen che na cumiscion valuteie l cajo. Sun pruposta dl assessëur Florian Mussner à la Jonta provinziela (NCUEI) ai 16 de lugio dat pro chësta cumiscion per la pert ladina.

Per mparé a cunëscer miec l’esperienza che i ladins-rumatsch à fat te passa 20 ani cun si rujeneda unificheda, se à na delegazion de istituzions ladines ancuntà cun promotëures, l’aministrazion cantonala y reprejentanc locai dla Val Müstair. Cun la vijita ti Grijons à la delegazion ai 23 de mei pudù capì miec cie che à funziunà y ciuni che ie stai i majeri fai: dut chësc per pudëi valuté miec la situazion dl Ladin standard per l raion dla Dolomites.