Atualità

USP – 66 jëuni ie chëst ann passei l ejam de stat y à nscì finà via la preparazion dla scoles autes ladines per zapé ite tl mond dl lëur. Danter i resultac dl ann de scola, prejentei (NCUEI) ai 13 de lugio dai assessëures provinziei ala scoles luna ora che tla scoles autes iel belau n chert che ne à nia finà l ann de scola positivamënter. Pra i ejams dla scoles mesanes y autes ladines ne vëniel nia me damandà doi rujenedes, ma nchin a cin rujenedes.

USP - Pra la gran mostra de ert nueva “Panorama 4” a Franzensfeste iel nce unì nvià cater artisc’ ladins. Aron Demetz y Gerhard Demetz ie ejëmpli di artisć ladins che à bele fat streda. Fabian Feichter y Diego Perathoner ie pert de na generazion jëuna che porta na vëta nueva tla maniera de fé ert ti luesc ladins. Tla sëuravijion dl’ert atuela tl Südtirol iel da ndut da udëi 33 posizions de ert contemporanea. – Na prejentazion de Diego Perathoner

USP - Te chësc mumënt iel 291 mutons y mutans che possa viver pra families de cura. Ma la cumpëida de genitores che ie desposc’ a tò su per n pez mutons o mutans d’autra families che à problems, va do ju. Tlo uelen judé cun na campania per furmé cuscienza, metuda a jì dala repartizion per familia y soziel, y prejenteda (NCUEI) ai 11 de lugio dal assessëur provinziel Theiner.

USP – La situazion ie tan sussot che la jontes provinzieles de Bulsan y Trënt se à metù adum per se paré dala invajion normativa da pert dl Guviern Talian te si mpëni de ressané la finanzes stateles. La doi jontes provinzieles deberieda cun i assessëures regiunei à tla senteda de crisa, (NCUEI) ai 11 de lugio a Bulsan, fat ora de se damandé n’ancunteda de prëscia cun Mario Monti per marciadé ora tant che la provinzies dëssa paië y per fé valëi l respet dl’Autonomia.

USP – La Jontes provinzieles de Bulsan y Trënt ne azetea nia che si cumpetënzes ne vën nia respetedes per via di pruvedimënc de sparani da pert dl Guviern talian. (DUMAN) mierculdi, ai 11 de lugio, se anconta la doi jontes provinzieles per fé ora deberieda cun la Jonta regiunela co se paré da Roma. L’ancunteda tl palaz Widmann a Bulsan scumëncia dala 12.00 da mesdì. Per la 13.00 iel udù dant de mëter man cun la cunferënza stampa.

USP – Le sostëgn dla cualité dla vita y dla sanité te comuns dl Südtirol y di Grijuns: chësc é le fin dl proiet Intereg IV sagns deboriada “insieme sano-gemeinsam gesund” che à metü man dan da oramai n ann. Cin comuns dl Südtirol Badia, Türesc tla Val Müstair, Vahrn, St. Martin in Passeier y Truden sciöche inće cin comuns di Grijuns sostignarà y metarà a jì scomenciadies de partezipaziun ativa da pert dla popolaziun. Śëgn él inće gnü publiché n foliet che reverda chësc proiet.

USP – La Jontes provinzieles de Bulsan y Trënt, deberieda cun la jonta regiunel uel cunsulté deberieda co jì inant tl raport cun l Guviern a Roma n cont dla mpustazions de sparani. “Di per di nes vëniel da Roma damandà velch de leprò. Ne pudon nia plu azeté che a Roma vëniel tëut dezijions de sparani zënza respeté la normes de autonomia” à di l presidënt dla Provinzia Luis Durnwalder (NCUEI) ai 09 de lugio do la senteda dla Jonta provinziela.

USP – La gran mostra de ert nueva a Franzensfeste pieta ntan trëi dumënies l’ntreda debant per udëi cie che l’ert dla trëi grupes de rujeneda dl Südtirol dà ca te chësc mumënt. De merdi sëira pieta “Panorama 4” vijites cumpaniedes dai curadëures y artisc’. Ai 10 de lugio saral nce l curadëur ladin Tobia Moroder y i artisc ladins Gerhard Demetz y Diego Perathoner.

USP – Tla sënta a dl Istitut Ladin a San Martin de Tor saral ntan l instà da udëi cater mostres de cater artisć’ ladins. La prima de chësta serie “Mostres 2012” ie de Gerald Moroder de Urtijëi che unirà giaurida n vënderdi ai 13 de lugio, dala 6 da sëira.

USP – Cun i ejams de matura fina chisc dis via l ann de scola 2011-12. I assessëures provinziei ala scoles Florian Mussner, Sabina Kasslatter Mur y Christian Tommasini prejenterà n vënderdi ai 13 de lugio n bilanz dl ann de scola y i resultac de matura.