Atualità

USP – Te si senteda (da NCUEI) ai 11 de juni à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce l dé ora dla lizënza per l antënes di fonins y l problem dla zertificazion dla detlarazion persunela de grupa de rujeneda.

USP - Per smendrì la fuera sun i jëufs uel la Jonta provinziela de Bulsan mëter a jì n daz. Cun tant che l unissa trat ite, ulëssen mëter a jì n miëur trasport publich y a chësta maniera pité n alternativa sterscia al auto privat. Per arjonjer dut chësc sënten sun na culaburazion cun la provinzies ujines.

USP – I assessëures provinziei à njenià na lingia de prupostes co che l Stat pudëssa sparanië custimënt tl Südtirol. La pruposta zentrela dla Provinzia ie de sëurantò dut l custimënt dl Stat tl Südtirol, sce la possa lessù se tenì nce i ultimi 10% dla chëutes.

USP – Per lauré ora na pruposta de lege urbanistica nueva à la Jonta provinziela dat pro i ponc zentrei. Da una pert dëssel unì scemplificà la pruzedures burocratiches y dal’autra pert dëssel unì coordinà miec l’ativiteies aministratives che reverda l’urbanistica y la cuntreda.

USP – La plaza dl aeroport a Bulsan dëssa unì adateda tulan demez na pert a nord y nen juntan leprò n’autra a sud. Sëuraprò a chësta dezijion, à la Jonta provinziela de Bulsan (NCUEI) ai 11 de juni nce fat ora de pité a Trënt na culaburazion tla gestion dla strutura.

USP - Che l sport possa cuntribuì a valorisé la mendranzes de rujeneda demostra l campionat europeich de juech al palé “Europeada”. Per l prim iede fajerà dai 16 ai 24 de juni nce pea na scuadra ladina. Chësta scuadra interladina che ie unida prejenteda (INIER) ai 10 de juni tl Istitut Ladin a S. Martin, pieta sëuraprò na bona ucajion de cuntat danter la jënt dla cin valedes ladines dla Dolomites. Sciche sustenidëur dla scuadra, à l assessëur Florian Mussner sorissà l valor di cuntac interladins che vën curei tres l juech al palé.

USP – Tan de jënt à pa la grupa de rujeneda ladina, la grupa taliana y tudëscia? I resultac dla detlarazion de grupa de rujeneda n ucajion dla cumpededa dla jënt 2011 unirà prejentei n merdi, 12 de juni te na cunferënza stampa a Bulsan.

USP – La gran mostra de ert nueva Panorama tla Furtëza de Franzensfeste scumëncia n vënderdi ai 15 de juni. La giaurida dla sëuravijion dl’ert atuela de duta trëi grupes de rujeneda tl Südtirol unirà tenida dala sies da sëira dai assessëures ala cultura Mussner, Kasslatter Mur y Tommasini.

USP - „Alfabetier“ é na racoiüda de materiai didatics por l’alfabetisaziun te de plü lingac tles prömes tlasses dla scora elementara, dà fora dal Departimënt Educaziun y Cultura Ladina, Inovaziun y consulënza, por promöie tla medema mosöra le lingaz dla uma y le secundo/terzo lingaz. Ai 13 y 14 de jügn gnaràl fat na presentaziun por le personal insegnant y dötes les porsones interessades a San Martin y a Urtijëi.

USP – N raion da frabiché cun nfrastrutures publiches sa Bula ie unì tratà tla senteda dla Cunsulta provinziela per la cultura dl frabiché y cuntreda. I cumëmbri nueves de chësta cunsulta ie de merz unic numinei dala Jonta provinziela.