Atualità

USP – Per cialé deberieda cie che la Provinzia y la banches da tlo possa fé tla situazion economica dl mumënt, iel ntan la senteda dla Jonta provinziela unì tenì n’ancunteda cun reprejentanc dla banches da tlo. (NCUEI) ai 21 de mei iel unì fat ora che n cumité di trëi assessëures provinziei Mussner, Widmann y Bizzo dëssa deberieda cun i diretëures generei dla banches lauré ora modiei per l daunì.

USP - Ncuei ai 21 de mei vëniel dala 10.00 tenì n menut de chiet te duta la scoles dl Südtirol. Cun chësc menut de chiet uel l mond dla scola dé esprescion de solidarietà de viers dla vitimes dl atentat a na scola a Brindisi y cundané uni sort de viulënza.

USP - La 17 scolines ladines à ntan chësc ann laurà ora n prufil pedagogich aldò de chël che possa unì urientà miec l lëur cun y per i pitli mutons y la pitla mutans. Chësc model de urientamënt ie (NCUEI) ai 18 de mei unì purtà dant ai reprejentanc di genitores, ai respunsabli di chemuns y dl sistem furmatif ladin, ma nce a istituzions che lëura deberieda cun la scolines ladines.

USP – Nchin ai 30 de mei iel tl Ufize dla region europea Tirol- Südtirol-Trentin a Bruxelles da udëi lëures de Ivan Lardschneider. La mostra dl scultëur de Sëlva ie unida giaurida n merdi ai 15 de mei.

USP – Per nsenië tla scoles y scolines ladines muessa i nsenianc documenté si cumpetënza linguistica tla rujeneda ladina. Pra l ejam de ladin per nsenianc iel unì mudà la pert scrita che ne sarà nia plu na traduzion ma dumandes a resposta davierta.

USP – Trëi scric premiei dl cuncors de leteratura ladina scrit ora dal Assessorat ala Cultura Ladina plu mo autri trëi pec cris ora dala cumiscion ie unic stampei te n liber. La prejentazion dla stories per jëuni y jëunes, y la premiazion dl cuncors „Autëures Ladins Scrij...“ unirà tenida n vënderdi ai 25 de mei dala 6 da sëira tl local di jëuni Saut a Urtijëi.

USP – Te n mëns, ai 15 de juni uniral tla Furtëza de Franzensfeste giaurì la cuarta edizion dla mostra Panorama, la gran mostra che pieta na sëuravijion dl’ert atuela tl Südtirol. Ala scumenciadiva dla repartizions provinzieles ala cultura dla trëi grupes de rujeneda deberieda cun l Museion fej nce pea de plu artisc’ ladins. I assessëures provinziei ala cultura à (NCUEI) ai 16 de mei prejentà la gran scumenciadiva.

USP – La cumiscion provinziela per la scunanza dla cuntreda ne à nia azetà l proiet de slargë l purtoi Cir te Sëlva. Tla senteda da (NCUEI) ai 15 de mei se à la cumiscion damandà che l proiet vënie laurà ora da nuef.

USP – La Jonta provinziela à dat pro la ndicazions provinzieles nueves aldò de chëles che i istituc tecnics economics dla valedes ladines possa anjenië i curricula per la terza, cuarta y cuinta tlas.

USP – De mei à sies de set cëses di parcs naturei inò giaurì. N ucajion dl ann nternaziunel dla flutra, à la cëses chëst ann dedicà scumenciadives ala flutra.