Atualità

USP – La Jonta provinziela à (INIER) ai 07 de mei dat pro l program per sustenì l lëur per y cun i jëuni tla valedes ladines ntan l ann 2012. L program pieta la basa per sustenì la lies y assoziazions di jëuni a livel finanziel y de cunsulënza.

USP – Bele dan 17 ani fova Carla Comploj unida tëuta su tla Ntendënza ladina per judé a nsenianc y genitores che sculeies cun dificulteies fisiches, psichiches o dificulteies tl mparè. Ti ani ie chësc servisc unì slargià a trëi culaburadëures, ma permò chëst ann ti iel unì recunesciù ufizialmënter la figura de ispetëura. A chësta maniera iel la Scola ladina ala pèr cun l’autra scoles n cont dla ntegrazion y cunsulënza.

USP – L program de atuazion dl parch tecnologich a Bulsan, tò demez lëures paralei danter Stat y Provinzia per sparanië, na grupa de tecnics per proiec europeics, sozieteies provinzieles, biblioteches y ncëries publiches ie stai i argumënc zentrei dla senteda dla Jonta provinziela ai 07 de mei. L presidënt Luis Durnwalder à cunedì la dezijions tla cunferënza stampa riesc do la senteda.

USP – Te si senteda da (NCUEI) ai 07 de mei à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce na grupa de tecnics per proiec europeics, la gestion de sozieteies provinzieles, na sënta per la trëi majera biblioteches, n recurs al’agenzia per ncëries publics.

USP – La Jonta provinziela uel sustenì l Guviern talian a abiné custimënc che l Stat pudëssa se sparanië tl Südtirol. La Jonta provinziela à (NCUEI) ai 07 de mei dat pro che analisan i custimënc, dëssel nce unì cialà ulache la Provinzia possa lascé demez lëures paralei.

USP – Ti proscimi cater ani uelen realisé n parch tenologich a Bulsan per arjonjer n majer potenzial de inuvazion, svilup y tueda tl Südtirol. Sun l vedl grunt dl Alumix che mesura 60 hectar, fej la Provinzia nvestizions per 54 milion de euro per ressané la strutura che ie bele y leprò mët la BLS (Business Location South Tirol) 6 milion de euro a desposizion acioche firmes gëure tlo na sënta.

USP – Davia che l unirà fat da nuef l asfalt, resta la streda de Gherdëina da Pruca ite sareda n merdi y mierculdi ai 8 y 9 de mei via per l di.

USP - Tl cheder dla formaziun di direturs dles scores y scolines ladines à l’Intendënza Ladina organisé na vijita al Museum nü Mansio Sebatum a San Laurënz te Puster ai 26 d’aurì.

USP – 250.000 persones, 2.000 curieres, 2.500 camper, 15.000 nchin 20.000 auti: cie che i esperc dla Provinzia se aspieta per l’ancunteda di Alpini dai 11 ai 13 de mei a Bulsan fej mprescion. Aldò ie nce stat l duvier de tò pruvedimënc sciche l abiné la lerch per i auti, rafurzé l trasport publich y garantì l’assistënza sanitera.

USP - Danter la scumenciadives dl Dipartimënt ladin per l’educazion dedichedes al’archeologia y ai prim seculi de vita dla populazion ladina, iel unì njenià n cufer de materiai didatics. Doi cudejiei per la scoles dedichei al tëmp dl fier tla Ladinia ie da permò unic prejentei tl Museum de Gherdëina.