Atualità

USP – I trëi intendënc dles scores dla Provinzia de Balsan s’à incuntè (INIER) ai 29 de merz tla sënta dl lizeo artistich y dla scora profescionala da Urtijëi por miorè le contat y laurè inant sön la bona colaboraziun danter les trëi Intendënzes.

USP – De juni saral da paië la prima rata dla nueva chëuta sun la puscions IMU. Per la calculazion uniral tëut ca i vedli valores dl cataster. Chësc vën metù a cuer dal assessëur Berger do che ti ultimi dis à jënt for inò damandà i valores dl cataster per calculé la chëuta IMU, ma chël ne ie nia debujën.

USP – La pruposta de lege cheder sun l IMU, la valutazion dl avëi provinziel per vënder o fité vel frabicac y l cumpré de curieres a idrogenn per sustenì la produzion de energia alternativa ie stai i argumënc zentrei dla senteda dla Jonta provinziela ai 26 de merz da pont de ududa ladin. L presidënt Luis Durnwalder à cunedì la dezijions tla cunferënza stampa riesc do la senteda.

USP – La Provinzia à puscions y frabicac per n valor de 4,4 miliardes de euro. Cun la senteda (da NCUEI) dl 26 de merz à la Jonta provinziela scumencià a valuté ciun frabicac che ne vën nia adurvei y che possa unì vendui o fitei.

USP – Nchin ala fin dl ann fejen cont che l mplant dal idrogenn a Bulsan Sud possa scumencé a lauré. La Provinzia uel se nuzé de chësta funtana de energia alternativa y va danora anjenian cin curieres a idrogenn. Chësc à la Jonta provinziela dat pro (NCUEI) ai 26 de merz.

USP – La Jonta provinziela de Bulsan à (NCUEI) ai 26 de merz dat pro la pruposta de lege che pieta ai chemuns la puscibltà de adaté la chëuta nueva IMU. La lege cheder dla Provinzia dëssa garantì unfat ntredes ai chemuns sciche dant, respetan dal’autra pert tant che l vën damandà da Roma per ressané la finanzes stateles. A chësta maniera uelen schivé de majera defrënzes danter i chemuns.

USP – Per pudëi nsenië tla scoles ladines muessen avëi fat n ejam de ladin per nsenianc. Ai 23 de merz ie 24 candidac de Gherdëina y dla Val Badia passei chësc ejam. Ëi possa sën fé dumanda de ruvé tla graduatories di nsenianc dla scoles y scolines ladines.

USP – Nia plu 27%, ma nchin a 40% dl finanziamënt sëurantulerà la Comunità Europea danter l 2014 y 2020 per fé dl tunel dl Prëner. Chësc à l cuordinadëur dl EU, Pat Cox segurà al presidënt dla Provinzia Durnwalder y duc i respunsabli ntan si vijita (NCUEI) ai 20 de merz a Bulsan. L presidënt dla Provinzia à menà do per la proietazion dla trates da ruvé permez al tunel.

USP – Per no ciarië l cunsumadëur de strom trëi iedesc cun chëutes à la Jonta provinziela purtà na pruposta te Cunsëi per tò demez la njonta provinziela y dé la puscibltà ai chemuns de renunzië sun si njonta. La lege nueva ie publicheda tla Gazëta ufiziela y jirà n droa (DUMAN) ai 21 de merz.

USP – N mierculdi ai 21 de merz va n droa la lege nueva per l cumerz. “Cun la regulamentazion nueva ons cialà de nuzé la pertes positives de tant che l Guviern Monti nes à metù dant n cont de liberalisazions y dal’autra pert ons cialà de defënder nosc sistem che va bën” dij l assessëur Thomas Widmann. La lege nueva ie (NCUEI, ai 20 de merz) publicheda tla Gazëta ufiziela.