Atualità

USP - Patrick Stuflesser menerà nce per i proscimi trëi ani la Cunsulta ladina di jëuni. N vënderdi sëira (2 dezëmber) à la Cunsulta nueva tenì si prima senteda cun vela dl presidënt. L assessëur provinziel ladin Mussner à te chësta ucajion tëut su n prim cuntat persunel cun chësc organn consultif per la Jonta provinziela y à cialà inant sun i argumënc de atualità per i jëuni.

USP – L bilanz provinziel da n auter ann sarà de 5,12 miliardes de euro. 220 milion de euro à la Jonta provinziela udù dant per sustenì l’economia. Co che chisc mesuns finanziei vën nuzei à (NCUEI) ai 2 de dezëmber prejentà i assessëures Roberto Bizzo y Thomas Widmann.

USP – Do avëi miurà y putenzià l trasport publich ntan i ultimi ani, vala sën de dl stabilisé y chësc nce da pont de ududa finanziel. Chësc à (NCUEI) ai 2 de dezëmber purtà dant l assessëur Thomas Widmann pra la prejentazion de si prioriteies per l bilanz provinziel 2012. Chël che unirà trat ite de plu dëssa unì nuzà per inuvazion tl ciamp dla mubilità.

USP – I assessëures provinziei ala scola Mussner, Kasslatter Mur y Tommasini à (NCUEI) ai 30 de nuvëmber ancuntà l Cunsëi naziunel dl’Istruzion publica che ti unì n vijita a Bulsan. Te chësta ucajion à i respunsabli de nosta scoles pudù prejenté la situazion particulera y curé i raporc cun i respunsabli a livel naziunel.

USP - Tles proscimes edemes gnaràl metü a jì tröpes scomenciadies por informè sön les Dolomites Patrimone mondial UNESCO. A chësta moda po i comuns tl raiun dl patrimone mondial s’anuzé tl dagnì de infopoints laurà fora aposta, che l’assessur provinzial Michl Laimer à sëgn presentè. Implü déssel gnì tachè sö dlungia l’autostrada placac che oj l’atenziun sön le patrimone mondial. Implü gnaràl ince arjigné ca material didatich.

USP - Na lingia de proiec tla ciamp dl ambient à l assessëur Michl Laimer prugramà de finanzië tres l bilanz provinziel 2012, ma dantaprima l cuncretisé dl plann per l tlima che vëij dant per n auter ann i prim vares cuncrec. Na priorità arà nce ideies n cont de Dolomites-Unesco y l „Manifest Südtirol“ cun n prim pruvedimënt che reverda l mëter adum de urbanistica y defendura dla cuntreda.

USP – Per l assessëur Hans Berger iel tler che sce n tën cont dla fazion dl turism per l’economia, ie chësc ciamp reprejentà melamënter. Purempò possel cun 36,5 milion de euro unì fat n pue’ de zeche, sce n va inant cun n marketing prufesciunel, sce n sënta sun la culaburazion danter urganisazions turistiches y abine formes nueves de finanziamënt.

USP – Cun la nomina di cunselieres nueves dla SEL à la Jonta provinziela (NCUEI) ai 28 de nuvëmber fat n var mpurtant per scumencé n capitul nuef dla sozietà dal strom. I cater cunselieres numinei dala Provinzia y la presidënta dl cunsëi de verdia reprejenteda na generazion jëuna, tecnica y nia politica. Danter i argumënc de majera nteres che l presidënt Durnwalder à prejentà riesc do la senteda iel la tratatives per la zentreles dla telecom per l internet a slune, l adatamënt dl lege per i lerneri y purtoies dai schi per ruvé nchin te valeda.

USP – De lugio à l Guviern a Roma adatà l furmazion di lerneri tres n decret che ie ie jit n dorva de utober. Nchin de auril muessa la Jonta provinziela adaté l regulamënt provinziel ala normatives stateles per nia messëi sëurantò de plën la normes stateles ueves.

USP – Doi proiec de purtoies dai schi ie (NCUEI) ai 28 de nuvëmber unic azetei dala Jonta provinziela de Bulsan. Te Puster possel unì adatà l purtoi de culegamënt danter Plan de Corones y la ferata. Te Ulten se tratela de pudëi furné cun i schi dala Schwemmalm nchin te valeda.