Atualità

USP – I truep jëuni che ne ie chëst ann nia stai boni de fé l ejam de amiscion per la facultà de scienzes dla furmazion a Persenon, puderà mpomo jì ala lezion sciche ghesc’ y pona fé do n auter ann l ejam de amiscion. Chësc à cunedì l presidënt dla Provinzia Durnwalder (NCUEI) ai 24 de utober do la senteda dla Jonta provinziela.

USP – La Jonta provinziela ie de chëla che la butëighes dëssa de dumënia resté stlutes. Da chësta posizion de basa dëssel, a una cun i partner soziei, mo unì fat ezezions.

USP – “Na lege balanzeda y valiveda ora”: nsci valutea l assessëur provinziel Roberto Bizzo la lege sun la ntegrazion de zitadins fulestieres data pro te Cunsëi provinziel. Aldò dl assessëur provinziel iel la imigrazion n fenomenn che n muessa aministré acioche l devënta na ucajion y nia me n problem. De chësc viers iel cun la lege nueva unì fat n var mpurtant.

USP – Le Museum Ladin stlüj jö la sajun da d’isté cun n gran batadù che gnarà metü a jì en domënia, ai 30 d’otober deborida cun l’Uniun di Stödafüch da San Martin de Tor. Les iscriziuns vëgn tutes sö bele danfora.

USP – I cëves dl’assoziazions dla ndustries talianes y tudësces, la presidënta dla Confindustria Emma Marcegaglia y l presidënt dl BDI Hans-Peter Keitel ie (N SËIRA) ai 20 de utober stai ghesc’ dl presidënt dla Provinzia Durnwalder tla Laimburg. I cëves dla gran ndustria à mustrà stima per l lëur dla Provinzia de Bulsan.

USP – A Persenon iel (NCUEI) ai 19 de utober unì giaurì ufizialmënter l toch nuef dla scola prufesciunela per la gastronomia y alimenteres „Emma Hellensteiner“. L frabicat cun de ndut feter 10.000 metri cubich ie unì sëurandat ala scola dal presidënt Durnwalder cun i assessëures Mussner y Berger.

USP – De judé inant i chemuns se ala (NCUEI) ai 17 de utober tratà ti argumënc de majer nteres. Acioche i chemuns possé fé l’ultima pert di culegamënc de internet a slune ti luesc y per curì l custimënt dla refezions de scola chier la Jonta provinziela do soluzions. Tla valeda de Ulten ti an metù n ciol trasmitënt ala lores.

USP – Tla descuscion sun l anjenië la pruposta de bilanz 2012 ie la Jonta provinziela (NCUEI) ai 17 de utober stat a una de nia auzé l IRAP y de la lascé do per chëla firmes che à na gran produtività, na gran segurëza per la stieres, che fej nvestimënc tla tueda y che ti vën nce ancontra ala families y al tlima.

USP – L Stat à chëst ann mudà la dumandes dl ejam de amiscion per fé l’università de scienzes dla furmazion a Persenon. Me 19% ie stai boni de passé l’ejam. Davia che la furmazion di maestri de scola ie scrita dant dal Stat, uel la Jonta provinziela abiné na soluzion per judé i jëuni a pudëi fé chëst studi universiter.

USP – La lores che ie ti ultimi dis jita ncantëur tla valeda de Ulten, à s’ën n ciol trasmitënt ntëur al col. Ntan la la nuet dl 17 de utober iel unì pià la lores che n à inò messù lascé jì. “L trasmitënt ti ie unì metù acioche savon ulache ie la lores, acioche pudon n cajo ti l fé al savëi ala jënt y acioche pudon, pernan che giapon la lizënza, nce l pië” à spiegà l presidënt Durnwalder do la senteda dla Jonta provinziela.