Atualità

USP – For plu families damanda de mandé si mutons ala refezion de scola. I chemuns se stënta a curì l custimënt y nsci uel la Jonta provinziela abiné soluzions tulan nce ite ulenteres.

USP - Aldò dla normes europees possa la Provinzia fé i culegamënc dl internet a slune nchin ala zentrela de uni chemun, ma nia nchin pra la cëses. Chësc ultimo toch dëssa perchël sëurantò i chemuns. La Jonta provinziela ie (NCUEI) ai 17 de utober stata a una de ti judé ai chemuns che ne ie nia boni de fé chisc lëures te curt tëmp.

USP – Tl Ciastel Tirol se à (NCUEI) ai 13 de utober ancuntà i reprejentanc dl Trentin, Bulsan y Tirol per la prima senteda do la fundazion dla grupa europea de culaburazion teritoriela (GECT/EVTZ). I obietives prinzipei dla culaburazion reveda la trassa dl Prëner, l auzé dl daz, l mparé rujenedes, la tueda y la union dla nfrastrutures tl ciamp dl’energia.

USP – De soluzions per la gestion dl’l’eghes sun Monta Sëuc - Puntives y a Badia se ala (NCUEI) ai 12 de utober tratà tla senteda dla cumiscion ambientela dla Provinzia de Bulsan. La cumiscion cun si presidënt Luigi Minach à azetà duc trëi proiec tla valedes ladines.

USP – La varianta per la sentadoia nueva y parëies contra levines sun Ciampinëi ie da permò unic dai pro dala Cumiscion per la defendura dla cuntreda. Tramedoi proiec tl chemun de Sëlva reverda l’atività dl jì cun i schi.

USP - N mierculdi ai 12 de utober uniral te dut l raion provinziel fat na prova dl’alarm dla prutezion zevila. Do la diesc danmesdì sunerà 400 sirenes te duta la provinzia.

USP – Pra l cunvëni sun l plurilinguism ti prim ani de vita RML2future a Klagenfurt à la prejentazion dl model plurilinguistich dla scolines ladines abù gran suzes. I partezipanc da de plu nazions à mustrà gran nteres per l model che ti vën pità ai mëndri y ala mëndres tla valedes ladines.

USP – La njonta regiunela IRPEF unirà tëuta demez defin per n davani nchin a 15.000 euro. A families cun mutons ti uniral sëuraprò mo unì ancontra. La Jonta provinziela ie (NCUEI) ai 10 de utober nce stata a una de ulëi mantenì l 2,98% per l IRAP y de jì jù a 2,5% per firmes che ie de ejëmpl.

USP – Sanità y soziel, furmazion y cultura, economia y lëur: chisc ie i ciamps prioriteies pra chëi che la Jonta provinziela ne scurta nia tl proscimo bilanz provinziel. „l ie ciamps fundamentei per l svilup de nosc raion che ti dajon priorità tl finanziamënt“ à dit l presidënt Durnwalder.

USP – Por sensibilisé la popolaziun y ciarè de tignì fora desgrazies sön les strisciores pedonales à l’Assessorat por i laûrs publics metü a jì na campagna a na moda che al vëgnes metü plü averda ales porsones che va a pé, che é dagnora la pert plü debla pro desgrazies. La brosciüra d’informaziun y i inserac é ince gnüs fac por ladin.