Atualità

USP – Pra l’ultima veles iel unì dat ora belau 3 milion de euro per sustenì zitadins oradecà a unì a cësa a lité. Cun la ntroduzion de veles tres posta fej la Jonta provinziela cont de sparanië chësc custimënt. Sce l ie mesun fé na tel regulamentazion dëssa sën stlarì i esperc de privacy a Roma.

USP – La Jonta provinziela à spartì su 40 milion de euro che ruva tl fond de rotazion per sustenì l’economia. Te si senteda (da NCUEI) ai 06 de setëmber à i assessëures provinziei tenì cont particularmënter dla dumandes tl ciamp turistich ulache n aspieta bele giut.

USP – Tla senteda dla Jonta provinziela iel (NCUEI) ai 06 de setëmber unì prejentà l studi dla Camera de cumerz de co che l’Aministrazion provinziela pudëssa sparanië.

USP – La situazion atuela de cuatieres soziei sëurandai y di cuntribuc provinziei per l cuatier mostra su che la populazion ladina ëssa rejon de plu cuatieres y cuntribuc, ma l ne ie nia assé dumandes y grunc da frabiché. La grupes de rujeneda tla provinzia de Bulsan à rejon de n aiut per cuatieres aldò de si grandëza. Chësta rejon depënd dal pruporz che ie l resultat dla detlarazion de grupa rujeneda, detlarazion che unirà d’autonn fata da nuef n ucajion dla cumpededa dla jënt.

USP – Sun l di, avisa 65 ani do la sotscrizion dl Tratat de Paris à la Jonta provinziela de Bulsan (NCUEI) ai 5 de setëmber sëurandat l’uneranzes de merit tl Ciastel Tirol. Nuef sustenidëures dl Südtirol à pudù pië do la uneranza y per l segondo iede iel nce unì sëurandat l pest dla mendranzes che à giapà la Union federalistica dla grupes etniches europees (FUEV).

USP - La nuviteies dl ann de scola nuef y l valor dla mujiga tl’educazion sarà chëst ann i argumënc zentrei tl Di dla Scola Ladina ai 9 de setëmber tl’università a Persenon. Danora prejenterà presidënt dla Provinzia, l assessëur ladin y l ntendënt ladin la nuviteies aministratives. Dopro saral da audì n referat sun l valor dla mujiga tl’educazion.

USP – Ti proscimi dis uniral sun ncëria dl Ufize provinziel per i parcs naturei y l Ispetorat furestel de Persenon scumëncia lëures per mëter a post i troies sun Resciesa, tl parch naturel Puez – Odles. I lëures ie unic azetei dal cunsëi de aministrazion dl parch naturel.

USP – Tla passa 1000 desgrazies ann per ann sun la stredes dl Südtirol ie la persona che va a pe daniëura la pert plu dëibla. Tl’Assessorat ai lëures publics se an dat ju cun chësta problematica y à laurà ora na campania de sensibilisazion dal titul “SOS Zebra” y criteries de cie che l’aministrazions dëssa tò n cunsciderazion a fé la strisces zebra. L proiet de culaburazion danter Assessorat provinziel, chemuns, scoles y assoziazions de jënt de tëmp ie unì prejentà (NCUEI) ai 31 de agost a Bulsan.

USP – La furmazion y la scoles vën tla valedes ladines finanziedes dala Provinzia de Bulsan tres de plu canai: i nsenianc depënd dala cumpëida de iscrizions, la frabiches vën fates aldò dl bujën y l’atività vën finanzieda aldò de plu criteries. La basa de tratatives per finanziamenc y l pëis che la populazion ladina giapa depënd n majera pert dal pruporz. D’autonn unirà la proporzion dla trëi grupes de rujeneda cumpededa ora da nuef. I zitadins puderà se detlaré anonimamënter pra si grupa de rujeneda.

USP – Na streda daujin a prei de Armentara, l cantier sun Jëuf de Sela y stredes per ruvé permez a luesc da paur tl chemun da Ciastel ie stai i proiec che reverda l raion ladin, tratei n merdi, 30 de agost, dala Segonda cumiscion provinziela per la defendura dla cuntreda. Chisc trëi proiec ie unic azetei cun vel cundizion.