Atualità

La cumpededa dla jënt ne à nia me na fazion sun l mumënt ma per i proscimi 10 ani y mo plu inant. Chësc ie stat l pensier prinzipel che l assessëur provinziel Florian Mussner à purtà (NCUEI) ai 04 de agost pra l’ancunteda de metà legislatura cun jurnalisc’ n cont dla pert ladina.

USP – N juebia dl’ena che vën, ai 11 de agost nvieia l presidënt dla Provinzia Luis Durnwalder i culaburadëures di media a n’ancunteda te si cësa a Pflazen. La cunferënza stampa da instà ie chëst ann nce l’ultima dla lingia dl’ancuntedes de metà legislatura di assessëures provinziei.

USP – Per l finanziamënt de 13 scoles dajerà la Provinzia de Bulsan ti ani 2011-13 ora feter 13 milion de euro a diesc chemuns. 7 milion unirà bele paiei ora chëst ann. Chësc ie unì fat ora dala Cumiscion provinziela per frabiché scoles che ie ai 29 de lugio unì meneda dal presidënt Durnwalder.

USP – Danter i 15 proiec che la Segonda cumiscion provinziela per stravardé la cuntreda à tëut tres te si senteda ai doi de agost, iel nce l proiet di coletores dal surëdl per la utia Sanon sun Mont de Sëuc.

USP – A metà legislatura anconta i assessëures provinziei i culaburadëures di media per cialé de reviers y cialé inant sun l’atività. N juebia ai 4 de agost tën l assessëur ladin Florian Mussner si ancunteda a Sureghes per rujené de argumënc che reverda la populazion ladina, i culegamënc internet a slune, stredes y la sëurandata de lëures publics.

USP – Le gran liber sön la storia di Ladins dles Dolomites dè fora dal Istitut Ladin vëgn presentè ciamò trëia iadi d’agost. Ai 5 d’agost a Col de Santa Lizia, ai 11 d’agost a Urtijëi y ai 19 a Corvara.

USP – La cerna dles strotöres culturales tles valades ladines é deventada plü rica. En sabeda, ai 30 de lugio él gnü daurì a San Ciascian n museum nü dediché ala laûrs preistorica dles Dolomites. Le Museum Ladin Ursus ladinicus presentëia sön trëi alzades la storia y l’ambiënt de vita dan da 40.000 agn dla laûrs di andri, de chëra ch’al é gnü ciafè i resc’ dan da 24 agn tl Ander de Conturines. Cater comëmbri dla Junta provinziala, le Presdiënt dla Provinzia Durnwalder cun i assessurs Kasslatter Mur, Mussner y Berger, deboriada cun l’ombolt de Badia Iaco Frenademetz, à daurì ufizialmënter le museum nü.

USP – N vëderdi ai 5 de agost vëniel sëurandat la stieres da nseniant per l ann de scola 2011-12 tla Scola Ladina. Nsenianc che ie tla graduatories possa se prejenté dala 9.00 danmesdì tla sënta dla Ntendënza Ladina a Bulsan.

USP – La defrënta sortes de sas sëura la streda da Bula ie cunesciudes danter i geologhes de livel nternaziunel ajache tlo se à mantenì drët bën sasc che se ova furmà dan feter 252 milion de ani. Chësta defrënta sortes de sas possen sën vijité drët saurì jan sun l troi geologich che unì giaurì (ncuei) ai 22 de lugio dal presidënt dla Provinzia Durnwalder y dal assessëur Florian Mussner.

USP – Pra la streda de zircunvalazion a S.Cristina vëniel finà l’ultima pertes. Tl Ufize provinziel per sëurandé i lëures iel n mierculdi ai 20 de lugio unì sëurandat i lëures per fé i dlandri di puenc “Monte Pana” y “Saslong”.