Atualità

USP - L lëur che vën fat dala sozietà de nfurmatica SIAG y dala repartizion provinziela Nfurmatica ie n pert l medemo. La Jonta provinziela à (NCUEI) te si senteda dl 11 de lugio delibrà de mascima de mëter adum chësta doi istituzions per la pert che reverda la coordinazion di lëures.

USP – L judé pea al Stat talian per la stabilità finanziera y la cunzescion dl autostreda dl Prëner ie (ncuei) ai 11 de lugio stai argumënc dl’ancunteda danter i presidënc dla provinzies de Bulsan y Trënt, Luis Durnwalder cun Lorenzo Dellai.

USP - Tl zënter culturel Grand Hotel de Toblach uniral fat na majera mostra dedicheda ala Dolomites, arpejon naturela mundiela Unesco. La Jonta Provinziela à (ncuei) ai 11 de lugio nciarià l Assessorat ai lëures publics de frabiché pro n toch.

USP – La Jonta provinziela à (ncuei) ai 11 de lugio dat pro de tò na milion de euro dal fond de resserva per curì spëises de aucac. L presidënt Durnwalder à metù a cuer che plures fates ala lesiera costa truep scioldi de chëutes.

USP – Tla provinzia de Bulsan iel vint chemuns che manacia de smendrì la populazion. La Jonta provinziela ie (ncuei) ai 11 de lugio stata a una de lascé lauré ora studi ti singuli raions per pudëi pona tò pruvedimënc cuncrec da valorisé chemuns critics. A chësta maniera iel unì dat pro i proscimi vares per l program “Südtirol 2021”.

USP – La Jonta provinziela à (ncuei) ai 11 de lugio dat pro a n cumpromis per ressolver la cuestion dl ngrandimënt dla tlinica Bonvicini a Bulsan, Gries. L dëssa me unì fat un partimënt leprò y de ndut manco cubatura nueva.

USP – Ntan l instà se gëura l Museum Ladin a ativiteies cultureles nce ora de si sënta tl Ciastel de Tor. Escuriscions tl parch naturel Puez Odles uni merdi, la jita tla Val di Murins de mierculdi, l domesdì per mëndri de juebia y l curs de ladin de vënderdi pieta a zitadins y families da tlo y fulestieres ucajion de mparé a cunëscer la particulariteies dla Ladinia tres spiegazions y prejentazions cumpetëntes.

USP - Cun l finé via di ejams de matura se stluj nce ju l ann de scola 2010-11. I assessëures provinziei ala scola Florian Mussner, Sabina Kasslatter Mur y Christian Tommasini prejenterà n vënderdi ai 15 de lugio per l prim iede deberieda y resultac di ejams dla scoles mesanes y scoles autes fajan nce n bilanz dl ann de scola.

USP – Sëires cun la butëighes daviertes dajerà nce ntan chësc instà plu vita a 32 luesc dl Südtirol. La scumenciadiva di buteghieres pieta aldò dl assessëur provinziel Widmann atratività y vitalità ai zëntri di luesc. Danter i luesc ladins à Corvara bele scumencià cun la prima sëira, n merdi ai 12 de lugio sarà S.Cristina l prim luech te Gherdëina a tenì la butëighes daviertes nce da sëira.

USP – L Cunsëi di Ministri a Roma à (ncuei) ai 7 de lugio azetà trëi normes de atuazion nueves. Ala senteda tl Palaz Chigi à nce tëut pert l presidënt dla Provinzia Luis Durnwalder. La normes nueves reverda i cuntroi dla Chëurt di Conc, l terzo cunselier de Stat dla provinzia de Bulsan y la cherta de identité nce per ladin ai zitadins dla frazions ladines de Ciastel.