Atualità

USP – Per pudëi fé mulins dal vënt per la produzion de strom ova la Jonta provinziela metù dant criteries tleres. Truep chemuns che ie bele dëibli de strutures, ne arjonj nia chisc criteries y nsci vëniel cialà do pusciblteies per ti giaurì la streda nce a chisc chemuns.

USP – La cumpëida dla pitla mutans y di pitli mutons scric ite ala scolina dla trëi grupes de rujeneda ie cun 16.430 mëndri majera che la populazion de na valeda ladina. La Jonta provinziela à (ncuei) ai 30 de mei tëut la dezijion ulà che l muessa unì sarà vel sezion y ulache l ie debujën de nen giaurì mo leprò. Deguna mudazions ne iel debujën tla scolines ladines.

USP – Per pudëi sëurandé de mëndra ncëries tecniches a maniera plu scëmpla, à la Jonta provinziela nvià via n’acurdanza nueva. Prufescionisc’ che fej pea, possa unì cris ora dal’aministrazions publiches zënza fé uni iede n cuncors a pert.

USP – Davia che sun la costes dla Talia vëniel daniëura adalerch muciadives nueves, muessen nce fé cont che l ne n unirà do tla provinzia de Bulsan. La Jonta provinziela à (ncuei) ai 30 de mei tratà la pusciblteies nueves de ti dé albierch, pensan per prim a casermes uetes.

USP - La Biblioteca provinziala Teßmann y la ciasa edituria Athesia inviëia ala presentaziun liber „Wege zur Kunst“ de Sebastian Marseiler, ai 7 de jügn 2011 dales 8 da sëra ta Biblioteca provinziala a Balsan.

USP – Tl Museum Ladin Ciastel de Tor iel (ncuei) ai 27 de mei unì giaurì una dl’atrazions plu mpurtantes da chëst ann, la mostra sun la ferata de Gherdëina danter lecorc y vijions. 95 ani do che chësta ferata fova furneda l prim iede possen jì a ti cialé a modiei, documënc uriginei, video y passa 100 fotografies. Nchin ala fin de utober puderan tl Museum Ladin nce paredlé la vijions da ntlëuta cun proiec de na ferata al didancuei.

USP - Chëst ann d’autonn uniral tenì la cumpëida dla jënt per udëi tan de persones che viv te nosta provinzia y coche les ie partides su danter la grupes de rujeneda. L assessëur provinziel ladin nvieia culaburadëures di media a na sëira de nfurmazion y sensibilisazion n merdi, 31 de mei, dala 6 da sëira sun Jëuf de Frea.

USP – A Urtijëi à (ncuei) ai 24 de mei messù unì fermà i lëures y sarà n cantier ajache l ne ie nia unì garantì la segurëza di lauranc. I ispetëures dl Ufize provinziel per scunanza tecnica dl lëur à messù tò chësc pruvedimënt ajache l manciova defin la mesures de segurëza y ajache l ie unì frabicà zënza respeté la regules scrites dant per lege. De plu lauranc à laurà a na autëza de feter 10 metri de autëza zënza vester segurei.

USP – 7.507 sculeies dala terza elementera nchin ala cuinta tlas dla scola auta à chëst ann fat pea l cuncors „Kangaroo dla matematica“ per la scoles de rujeneda tudëscia y ladina. Danter i sculeies dla terza tlasses mesanes à venciù Klaus Prinoth dla scola mesana de Urtijëi che à arjont l miëur resultat de duta la categuries. N merdi (ncuei) ai 24 de mei ie tl palaz Widmann a Bulsan unì premiei 55 sculeies.

USP - Per museré la cumpetënza dla rujenedes tla scoles ladines à l Cumité per l’Evaluazion nvià via n’analisa sun basa scientifica. I resultac sun la cumpetënza dl tudësch, talian y ladin di sculeies dla scoles autes unirà prejentei n mierculdi ai prim de juni tl’Università a Persenon. Ala prejentazion cun i prufessëures Rita Franceschini y Pasquale Della Rosa ie nviei duc i nteressei.