Atualità

USP – La ferata de Gherdëina giapa chëst ann, 50 ani do che la fova unida tëuta demez, na valorisazion particulera. L Museum Ladin Ciastel de Tor gëura n vënderdi ai 27 de mei na mostra dedicheda a lecorc y vijions ntëur chësc mesun de trasport, documentan arjontes de chëi tëmps che à fat mudé Gherdëina. La giaurida sarà dala 6 da sëira a San Martin de Tor.

USP – L Ufize Apalc dla Provinzia de Bulsan à sëurandat la ncëria de proieté lëures pra la casermes de Sëuc y Corvara. Tlo vëniel fat cuatieres che la Provinzia barata cun l Stat, giapan puscions militeres che ne vën nia nuzedes.

USP – La streda de zircunvalazion de S.Cristina ie unida frabicheda per l bën dla cumenanza arjunjan manco fuera y fum danter la cëses, plu cualità de vita per la populazion y na revalutazion dl zënter. Realisé tan de gran nfrastrutures cumporta nce che vel singul à n svantaje. “Tl cajo dl luech “L’Ampezan” ons cialà do pusciblteies de unì ancontra y on danterauter nce proietà nvestimënc contra la fuera” nsci tol l’assessëur provinziel Florian Mussner posizion ala cuestion trata su tla zaites dl dann per la cësa che ie daujin ala streda nueva.

USP – Nsenianc dla scoles de mujiga de rujeneda tudëscia y ladina possa ai 4 y 5 de agost aldò dla graduatories, crì ora la scola de nseniamënt. Per nsenianc dla scoles prufesciuneles possa la stieres per l proscimo ann de scola unì crises ora dai 9 ai 12 de agost tla sënta dl Ufize provinziel per personal de scola.

USP – L program strategich per la families, la cundizions per pudëi fé mplanc dal strom cun la forza dl vënt y pusciblteies per tò su mo muciadives dal Nordafrica ie stai i argumënc zentrei prejentei dal presidënt dla Provinzia, ncuei, 16 de mei do la senteda dla Jonta. Mplu à i assessëures tratà n dessëni de lege per l’Euregio, l cunvëni sun la nuet di fuesc y la culaburazion danter Eurac y Università de Bulsan.

USP – I storics Rolf Steininger, Leopold Steurer y Carlo Romeo prejenterà ai 9 de juni i ponc de ududa sun la nuet di fuesc. La sëira cureda al Archiv provinziel, sun scumenciadiva dla Jonta provinziela, unirà tenida tla cësa Kolping a Bulsan.

USP - La Jonta provinziela uel sustenì de plu la families. L aiuc che ie bele dëssa unì miurei, leprò dëssel unì pruvedimënc nueves y i aiuc muessa pudëi unì damandei te na maniera plu scëmpla y plu a slune. Chësc à i assessëures provinziei fat ora (ncuei) ai 16 de mei n cont dla strategia per na miëur politica dla familia.

USP – La forza dl vënt possa tl Südtirol unì adurveda per la produzion de strom sce l vën tenì ite la cundizions aldò. Chësc à la Jonta provinziela (ncuei) ai 16 de mei dat pro, fajan nsci n var inant tl cunzet dl program tlima, dat pro l’ena passeda.

USP – Acioche la Grupa europea de culaburazion teritoriela GECT/EVTZ danter la Provinzies de Trënt, Bulsan y Tirol, da permò dates pro a Roma, posse efetivamënter lauré, iel debujën de n regulamënt a livel provinziel. L articul dla pruposta de lege aldò ie (ncuei) ai 16 de mei unì dat pro dala Jonta provinziela y unirà proscimamënter tratà te Cunsëi provinziel.

USP – Sce na copia se spartësc, resta un di doi zënza cuatier. Canche l ie mutons, ti vën chisc majera pert lascei ala fëna y nsci ie suvënz l ël zënza cuatier, sun streda. La Jonta provinziela à (ncuei) ai 16 de mei scumencià a traté chësta problematica.