Atualità

USP – Cun na zeremonia (NCUEI) ai 18 de auril iel a Dispruch unì nvià via la terza pert dl proiet dl tunel de basa dl Prëner che reverda l tunel prinzipel. Per chësc avenimënt iel unit adalerch l cumisser europeich per l trasport Siim Kallas, l minister per la nfrastrutures talian Altero Matteoli y chël austriach Doris Bures. Chësc ie stat n mumënt sun chël che n ova aspità ert do che l’Austria y la Talia à stlarì l finanziamënt.

USP - 40 milion ie unic udui dant dal’acurdanza de Milan danter Stat y Provinzia per chemuns ujins ala Provinzia de Bulsan. Chisc vën aministrei da na gestion a pert. “L’aministrazion de chisc scioldi muessa unì fata a una cun la Provinzia. Ajache chësc ne vën nia fat, messons se paré cun aucac” à dit l presidënt dla Provinzia Durnwalder.

USP – L finanziamënt de urganisazions turistiches ie ai 18 de auril (NCUEI) stat argumënt dla senteda dla Jonta provinziela. Do na descuscion longia iel unì tëut la dezijion de nia sëurantò l regulamënt statel. “Dal’autra pert ne ons nce deguna prescion de messei te puech tëmp mëter n drova na forma nueva de finanziamënt” à dit l presidënt dla Provinzia Durnwalder.

USP - Debant y te na maniera resserveda possa l’ëiles se nuzé de na cunsulënza sun cuestions legales. Chësta puscibltà piteda dala Cumiscion per la valivanza ne vën sën nia me piteda a Bulsan, ma nce a Maran, Persenon, Burnech y Neumarkt.

USP – Danter la feter 500 ideies che ie unides mandedes ite tres n cuncors per n cialé ora nuef l relief de Mussolini sun l palaz dla finanzes a Bulsan, à la cumiscion nciarieda cris ora cin prupostes. Ai 18 de auril (NCUEI) ie chësta prupostes unides prejentedes ala Jonta provinziela che valuterà ciuna idea che dëssa unì realiseda.

USP - Manco muvimënt de auti y plu cualità de vita ie stat l pensier che à cumpanià NCUEI domesdì (16 auril) la giaurida dl prim toch dla zircunvalazion de Persenon. N lunesc puderà passé i prim auti. L presidënt dla Provinzia Luis Durnwalder y l assessëur ai lëures publics Florian Mussner à deberieda cun l ambolt de Persenon tenì la zeremonia y festejà la revalutazion dla zità.

USP – 162 maestri de schi nueves i anjeniei per l nseniamënt sun i purtoies. Tl cheder dla fiera „Prowinter“ à l assessëur Hans Berger (NCUEI) ai 15 de auril pudù sëurandé i diploms a 72 maestri de schi alpin, 14 maestri de podejé, 19 maestri de snowboard y 28 diretëures dla scoles de schi. 18 maestri de schi à stlut ju na spezialisazion per lauré cun mëndri. Danter i diplomei nueves iel de ndut 33 ladins.

USP – Da n merdi ai 19 nchin sada 23 de auril uniral de nuet salansà i tuniei sun la streda de Gherdëina da Tluses ite. Per via de chisc lëures puderan me passé i tuniei te una direzion al iede.

USP – Ciun che dëssa vester l svilup urbanistich de Gherdëina ie unì studià da grupes de lëur di chemuns de Gherdëina y chemuns ujins, cun l sustëni dl’Academia Europeica EURAC. I resultat, metù adum tl cunzet tlamà Masterplan per Gherdëina ie unì sëurandat ufizialmënter ai ambolc de Sëlva, S.Cristina, Urtijëi, Ciastel y Laion per l’apruvazion y per la realisazion. Per l assessëur provinziel Laimer ie chësc n strumënt inuvatif de planificazion urbanistica de ejëmpl nce per d’autri raions.

USP – Canche i mplanc portamont sera d’ansciuda, ne iel mo nia gheneda sun i purtoies y sun la montes. Nscila iela inò stata n lunesc de chëst ena (ai 11 de auril): sun Plan de Gralba à culaburadëures dla Furestela fermà su set motoslites che ova fat la Sellaronda. Da pert dla stazion dla Furestela de Persenon vëniel lecurdà che de tel raides cun la motoslites ie pruibides per lege ti raions sota defendura y che l vën fat cuntroi dedichei.