Atualità

USP – I prim muciadives dal’Africa dl nord che ruverà tl Südtirol giaperà da albierch tla vedla caserma Gorio ti plans de Bulsan. Chësc ie unì udù dant dala Jonta provinziela te si senteda (da NCUEI) ai 11 de auril. Sce l ëssa da unì do mo de plu jënt, uniral nuzà nce d’autra casermes uetes.

USP – A Runcadic vëniel chisc dis scumencià i lëures per fé la streda dala rodes. Per chësta rejon puderà l muvimënt de streda me passé te una direzion al iede.

USP - La scola d’Ert de Urtijëi à njenià na bela cumpëida de lëures de xilografia, na tecnica de chedri fai cun n stempl ziplà tl lën. N vënderdi ai 15 de auril uniral dala trëi domesdì giaurì na mostra de chisc lëures dedicheda al artist Remo Wolf.

USP – La scuadra de Gherdëina à venciù l turnoi de hockey danter la scoles mesanes dla cin valedes ladines. L’ancuntedes sun la dlacia de Sëlva à cuntribuì a intensifiché i cuntac danter sculeies y respunsabli dla scoles dla valedes ladins tl cheder dla cumpetizion sportiva.

USP – La scola d’ert Cademia de Urtijëi à abù suzes pra l cuncors provinziel de depënjer metù a jì a livel de Südtirol. Danter i premiei de plu categuries iel nce trëi sculees d’ert a Urtijëi.

USP – Da n sada ai 9 nchin dumënia ai 17 de auril vëniel a livel talian tenì l’ena dla cultura. Passa 2500 istituzions pieta ntan chëst’ena ntredes debant. Vel scumenciadives unirà nce pitedes tla provinzia de Bulsan. “Jan de viers dla capitela europea dla cultura 2019, ie chësta manifestazion na bona ucajion per mustré su la cultura” dij l’assessëur provinziel Tommasini che à nvià via la candidatura.

USP – N cont dla persones che mucia dal’Africa dl nord al costes dla Talia, vëniel a se l dé na situazion nueva. Do la tratatives danter Stat y regions, ulache n sëira (6 auril) à nce rujenà pea l vizepresidënt Hans Berger, tulerà la Talia na streda nueva dajan ora lizënzes de sujurnanza a tëmp. La planificazion per la regions devënta a chësta maniera plu cumplicheda, ma perchël toma l problem di zëntri de identificazion.

USP - Dan doi ani fovel unì spartì la ncëria da ispetëura y diretëura dla scolines ladines tres la lege provinziela nueva sun ala formazion. Chisc dis à Hannelore Insam venciù cun gran merit l cuncors per sëurandé da nuef la ncëria da diretëura. Chësta stiera cumporta la urganisazion y l svilup urganisatif per 743 sculeies cun 104 culaburadëures tla 17 scolines dla valedes ladines.

USP – Co che dëssa unì furmei i nsenianc ladins vëniel ncuei (6 auril) tratà te n cungres a Persenon. Cun chësc cunvëni vëniel festejà i 10 ani dla Repartizion ladina d’Università y i respunsabli plu auc dl’università cun l assessëur provinziel ladin à te chësta ucajion mpermetù sustëni per svilupé mo inant la repartizion ladina. Ntan l di vëniel paredlà reformes dl sistem furmatif ti raions de mendranza ujins y dat lerch à prupostes nueves che dëssa mustré su la streda dla repartizion ladina per l daunì.

USP – Tl proscimo ann de scola saral 27 sculëis de plu tla scoles autes ladines. La cumpëida generela di sculeies dala scolines nchin tla scoles autes sarà de setëmber cun de ndut 3312 sculeies, ënghe de 27 majera. L aumënt de iscrizions vën valutà dai respunsabli dla scola sciche sëni de crëta de vies dl sistem scolastich ladin cun l nseniamënt de plu rujenedes.