Atualità

USP – La situazion atuela n cont de culegamënc per i fonins y l’internet ie ncuei (07 fauré) stata un di argumënc zentrei dla senteda dla Jonta provinziela. A una de ulëi ruvé plu riesc a n miuramënt di culegamënc tla valedes da na pert ora, se damanderan n’ancunteda cun l aministradëur dla Telecom Franco Barnabé.

USP – Ala descuscion sce tò demez l relief de Mussolini sun l palaz dla finanzes a Bulsan o no, respuend la Jonta provinziela cun n cuncors de ideies. Te si senteda dl 07 de fauré (ncuei) iel unì dat pro de abiné adum prupostes che ne desdruj nia l relief, ma che l ne sibe nia plu da udëi ala lergia y che l ne sibe nia plu na pruvocazion per la cunvivënza dla grupes de rujeneda.

USP – La Jonta provinziela à dat pro i urientamënc spezifics per la scoles autes. La dezijion di assessëures provinziei reverda la spartizion dla scoles spezifiches per sport, mujiga y alimentazion. Chisc urientamënc spezifics reverda dantaprima la scoles de rujeneda tudëscia tla ziteies y ne toca nia la scoles autes ladines.

USP – Sculeies che ulëssa nfurmazion sun la vela nueva de scoles autes tl Südtirol giapa chisc dis n cudejel ulache i possa se fé n cheder dla situazion. L cudejel nuef ie na pert dla campania de comunicazion dla Provinzia de Bulsan sun la reforma dla scola auta y vën partì ora tla scoles mesanes, scoles prufesciuneles y scoles autes.

USP – Duman merdi (8 fauré), dala 18.00 nchin la 20.00 sarà l presidënt dla provinzia Durnwalder a desposizion per respuender ala dumandes de duc i nteressei. Chësc forum vën pità tres internet sun la plates provinzieles (www.provinzia.bz.it) ulache n possa mandé ite la dumandes y pona nce liejer la respostes.

USP - l Ntendënt dla scoles ladines Roland Verra y l diretëur dl INVALSI Dino Cristianini à arjont n’acurdanza sun la proves de cumpetënza per i sculeies dla scola ladina. La proves unirà chëst ann fates ala fin dla scola elementera y dla scola mesana.

USP - La forma dl censimënt 2011 che la Jonta provinziela de Bulsan à dat pro chëst ena ie dezisiva per i dërc dla populazion ladina tl daunì. L assessëur ladin Mussner valutea la dezijion dla Jonta sciche arjonta mpurtanta de nosta mendranza etnica. La detlarazion de grupa de rujeneda a fin de statistica ie la fundamënta per seguré i dërc di ladins ti ani che vën.

USP – Ntan i ultimi cin ani ie tla provinzia de Bulsan smendrida la grandëza dla families. La mesaria de davani de familia ie resteda feter unfat. Tla prejentazion stata (ncuei) ai 03 de fauré a Bulsan à l presidënt dla Provinzia Durnwalder valutà i resultac dl studi sciche na resposta positiva ai pruvedimënc contra la crisa finanziera y sciche cheder dla situazion atuela dla families.

Chëst ena che vën, dai 7 ai 11 de fauré, tën l aucat populer udienzes te de pu luesc. La Udienzes te Gherdëina sarà n juebia ai 10 de fauré, l di do, vënderdi ai 11 de fauré vën chësc servisc pità tla Val Badia.

USP – La materies che unirà damandedes tla segonda prova scrita dl’ejam de stat tla scoles autes ladines ie unides crisses ora. Tla trëi sezions defrëntes se tratela de economia aziendela, rujenedes fulestieres y dessëni. La Ntendënza ladina a una cun l Minister dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.