Atualità
-
Adurvé l fonin ala drëta maniera: curs per nsenianc y educadëures
USP – “Ti mustré ai jëuni co adurvé ala drëta maniera l fonin”: chësc sarà argumënt de n di de curs metù a jì dal Ufize provinziel per media audiovisuei. Referënt dl curs per nsenianc y educadëures ie Günther Laimer. Chësc curs vën pità ai 3 de dezëmber a Bulsan.
-
Aucat populer, n vënderdi ai 12 a S.Martin
Chëst ena che vën, dai 8 ai 12 de nuvëmber, tën l aucat populer udienzes te de pu luesc. A S.Martin de Tor saral n vënderdi 12 de nuvëmber.
-
Stazion dal tëmp nueva a Toblach
USP – A Toblach iel chisc dis unì metù man de lauré cun na stazion dal tëmp nueva. Chësta stazion fej pert de n program de ndut 34 stazions che l Servisc provinziel per l tëmp ie tl lëur de baraté ora.
-
Gran orden de merit al Intendant dl BR Gruber
USP - L gran orden de merit dla Provinzia de Bulsan ie ncuei (3 nuvëmber) unì sëurandat dal presidënt Luis Durnwalder al Intendant dl Bayrischer Rundfunk (BR) Thomas Gruber. „Ël ne à nia me cialà che l Südtirol sibe argumënt sun l BR y l ARD, Gruber à nce dat n gran sustëni acioche tla provinzia de Bulsan pudons udëi la televijion tudëscia“ à detlarà Durnwalder.
-
Durnwalder: “cun Benedikter se n ie jita na figura zentrela dla storia dl’autonomia”
USP – “Alfons Benedikter ie stat una dla figures zentreles dla storia dl Südtirol ti ani do la segonda gran viera, n architet dl’autonomia y pere de nosc sistem urbanistich” cun chësta paroles lecorda l presidënt dla provinzia Durnwalder Alfons Benedikter che ie stat passa trënt ani assessëur dla Jonta provinziela de Bulsan.
-
Materiai didatics sön les liëndes ladines ales scores
Tl cheder dl proiet RAIS de promoziun dl plurilinguism é gnü presentà ai 27 de otober tla ciasa dla Cultura a La Ila i materiai didatics nüs sön la liënda de Fanes, plü avisa a n publich de insegnanc y scolars dles scores mesanes y altes dla Val Badia da pert di auturs.
-
Giaurì l cunvëni sun l nseniamënt de rujenedes a Urtijëi
USP – A Urtijëi iel ncuei danmesdì (28 utober) unì giaurì n cunvëni de trëi dis per ti jì plu sot a metodologies y didatiches dl plurilinguism. Te na culaburazion danter scola ladina y taliana vëniel pità n ajurnamënt ai nsenianc per miuré la cualità dl nseniamënt dla rujenedes. L fej pea feter 200 esperc de cin mendranzes etniches cun persunaliteies dl Minister dl’istruzion y dl’università de Unieja.
-
Sinergies per la stredes tla Ladinia
USP - L muvimënt y la segurëza sun la stredes dla Val Badia y de Gherdëina ntan l inviern ie inier domesdì, 27 utober, stat argumënt de n’ancunteda dl assessëur provinziel per la stredes Florian Mussner cun i ambolc y assessëures di chemuns dla Val Badia y de Gherdëina. A Corvara iel unì giaurì na vijion de culaburazion per se nuzé de sinergies.
-
Deberieda per i jëuni ladins
USP - L ultimo studi sun i jëuni dl Südtirol à mustrà de plu aspec positives di jëuni ladins, ma nce tendënzes che pudëssa deventé problematiches. Sun nvit dl assessëur Florian Mussner se à nsëira (27 utober) ancuntà reprejentanc di servijes y lies di jëuni cun assessëures di chemuns y respunsabli de istituzions provinzieles per se dé ju cun i resultac dla nrescida sun i jëuni. L’ancunteda tl zënter per jëuni a Urtijëi ie stat n prim var per muever scumenciadives miredes ai problems di jëuni ladins.
-
Dantercëpies y Resciesa tla Cumiscion per la cuntreda
USP – L raion da jì cun i schi Dantercëpies y la utia de Resciesa ie n merdi, 26 de utober unì tratei dala segonda Cumiscion provinziela per la cuntreda. Al orden dl di fovel de ndut 18 proiec publics y privac.